Fransada parlamentin aşağı palatası 15 yaşdan kiçik uşaqların sosial şəbəkələrdən istifadə etməsini qadağan edən qanun layihəsini təsdiqləyib. Qanun layihəsi gecə iclasında qəbul olunub — 130 deputat təşəbbüsü dəstəkləyib, 21 nəfər əleyhinə səs verib.
Elchi.az xəbər verir ki, bu barədə “The Guardian” məlumat yayıb.
Qanun layihəsi uşaqları və yeniyetmələri ekran qarşısında çox vaxt keçirmənin və sosial platformaların mənfi təsirlərindən qorumağı hədəfləyir. Fransanın Prezidenti Emmanuel Makron qəbul edilmiş qərarı gənc nəsilin təhlükəsizliyinin təmin olunması istiqamətində vacib addım adlandırıb. O, dəfələrlə vurğulayıb ki, sosial şəbəkələr yeniyetmələrin psixi sağlamlığına zərər verə bilər.
İndi sənəd Senatda müzakirə olunmalıdır. Qanun yekun təsdiqlənərsə, Fransa Avstraliyadan sonra bu cür yaş məhdudiyyətini tətbiq edən ikinci ölkə olacaq. Qanunda həmçinin liseylərdə mobil telefonların istifadəsi də qadağan edilir.
Hakimiyyət 2026-cı ilin tədris ilindən etibarən yeni qaydaların yeni hesablar üçün tətbiqini planlaşdırır. Sosial platformalara artıq mövcud olan, yaş tələblərinə cavab verməyən hesabları ilin sonuna qədər bağlamaq üçün vaxt veriləcək.
Qanun 15 yaşdan kiçik yetkinlik yaşına çatmamış şəxslərin onlayn sosial şəbəkələrə çıxışını birbaşa qadağan edir. Bununla belə, təhsil platformaları və onlayn ensiklopediyalar qanundan istisna olunub. Təşəbbüsün həyata keçirilməsi üçün effektiv yaş yoxlama sistemi tətbiq olunmalı və bu istiqamətdə işlər bütün Avropa səviyyəsində aparılır.
Məryəm
