Almaniya kansleri Fridrix Mers Qəzzanın idarə olunması üzrə “Sülh Şurası”nın nizamnaməsinin Davosda keçiriləcək imzalanma mərasimində iştirak etməyəcək.
Elchi.az xəbər verir ki, bu barədə jurnalistlərə Almaniya hökumətinin nümayəndəsi Şteffen Mayer məlumat verib.
O bildirib ki, Mersin mərasimdə iştirak etməməsi kanslerin iş qrafiki ilə bağlıdır. “Almaniya kansleri cümə axşamı səhər çıxışından dərhal sonra Davosu tərk edəcək, çünki Brüsseldə ilkin danışıqlar planlaşdırılıb. Bu isə o deməkdir ki, ‘Sülh Şurası’nın yaradılması mərasimi kansler artıq getdikdən sonra baş tutacaq,” – deyə Mayer bildirib. Onun sözlərinə görə, ABŞ tərəfi bu barədə əvvəlcədən məlumatlandırılıb.
Bununla yanaşı, Almaniya hökumətinin nümayəndəsi vurğulayıb ki, Almaniya şuraya qoşulmaq üçün göndərilən dəvətə görə minnətdardır. “Biz bu regionda sülhə xidmət etmək məqsədini bölüşürük. Xüsusilə Qəzzada münaqişənin dayanıqlı şəkildə nizamlanmasına töhfə vermək istəyirik. Buna uyğun olaraq, bu təklifi araşdırırıq və müvafiq vaxtda mütləq cavab verəcəyik,” – deyə Mayer qeyd edib.
Məryəm
