Astronomlar, alimlərin qiymətləndirməsinə görə, təxminən 100 milyon il sakit vəziyyətdə qaldıqdan sonra yenidən aktiv fazaya keçən superkütləli qara boşluğun unikal radioşəkillərini əldə ediblər.
Elchi.az xəbər verir ki, bu barədə “Daily Mail” yazır.
J1007+3540 adı verilən obyekt “kosmik vulkan”la müqayisə oluna biləcək miqyasda güclü plazma püskürmələri nümayiş etdirir.
Qalaktikanın mərkəzindən çıxan radioşüalar demək olar ki, bir milyon işıq ili məsafəyə qədər uzanır ki, bu da Süd Yolunun diametrindən təxminən on dəfə böyükdür. Tədqiqatçıların sözlərinə görə, bu cür püskürmələr qazın paylanmasını və qalaktikalararası mühitin quruluşunu dəyişdirərək ev sahibi qalaktikanın təkamülünə ciddi təsir göstərə bilər.
“Bu, sanki kosmik vulkanın uzun sakitlik dövründən sonra yenidən püskürməyə başlamasına bənzəyir”, – deyə araşdırmanın müəllifi doktor Şobha Kumari bildirib.
J1007+3540 son dərəcə isti və sıx qazla dolu olan nəhəng qalaktika toplusunun mərkəzində yerləşir. Bu mühitdə ətraf maddənin təzyiqi ilə qara boşluğun buraxdığı enerji arasında daimi qarşıdurma gedir.
Superkütləli qara boşluqlar demək olar ki, bütün qalaktikaların nüvəsində mövcuddur və kütlələri Günəşin kütləsindən milyonlarla, bəzən isə milyardlarla dəfə böyük olur.
Maddə hadisələr üfüqünə doğru burulduqda, həddindən artıq yüksək temperaturadək qızır. Bəzi hallarda bu maddənin bir hissəsi udulmur, əksinə, həddindən artıq qızmış plazma şəklində dar istiqamətli şırnaqlar kimi kosmosa atılır və güclü radioşüalanma yaradır.
Məryəm
