Misir və Livan Livanın elektrik enerjisi istehsalı üçün ehtiyac duyduğu təbii qazın tədarükü ilə bağlı anlaşma memorandumu imzalayıblar.
Elchi.az xəbər verir ki, Livan Baş Nazirinin Ofisindən verilən açıqlamaya görə, imzalanma mərasimi Beyrutdakı Hökumət Sarayında Baş nazir Nəvaf Salamın iştirakı ilə baş tutub.
Mərasimdə Livanın Enerji naziri Cozef Səddi və Misirin Neft və Mineral Ehtiyatlar naziri Kərim Bədəvi Livanın elektrik enerjisi istehsalı üçün lazım olan təbii qazın tədarükü ilə bağlı anlaşma memorandumunu imzalayıblar. Mərasimdən sonra çıxış edən Livan naziri Səddi enerji sektorunu tədricən neftdən təbii qaza keçirmək qərarına gəldiklərini bildirib və əlavə edib ki, “Təbii qaz neftlə müqayisədə həm daha ucuzdur, həm də ətraf mühitə daha az zərərlidir”.
Misir təbii qazının İordaniya və Suriya vasitəsilə Livana nəqlinin xərcləri və hazırlıqlarına gəldikdə, Səddi bildirib ki, boru kəmərinin Livan hissəsinin yenidən işə salınması üçün tələb olunan iş yüksək xərc tələb etməyəcək və proses təxminən 3-4 ay çəkə bilər.
Digər tərəfdən, Səddi Suriya tərəfində də oxşar bir prosesin davam etdiyini və boru kəmərinin Livandakı Deyr Əmmar Elektrik Stansiyasından Suriya sərhədinə qədər uzanan hissəsinin yenidən aktivləşdirilməsi üçün donorlarla əlaqə qurulacağını bildirdi.
Səddi təbii qazdan istifadə etməkdə israr etmələrinin əsas səbəblərindən birinin mənbənin şaxələndirilməsini təmin etmək olduğunu və bu çərçivədə Körfəz ölkələri ilə və Beynəlxalq Maliyyə Korporasiyası (IFC) vasitəsilə təbii qazla işləyəcək yeni elektrik stansiyaları qurmaq və təbii qaz təchizatı infrastrukturunu inkişaf etdirmək üçün çalışdıqlarını bildirdi.
Nazir Səddi bu prosesdə İordaniya və Suriya ilə də danışıqlar aparılacağını bildirdi və Suriyada boru kəməri işi və qaz təchizatı ilə bağlı Sezar Sanksiyaları Aktından irəli gələn maneənin artıq aradan qaldırıldığını xatırlatdı.
Razılaşma təbii qazın boru kəməri vasitəsilə Livanın şimalındakı Deyr Əmmar Elektrik Stansiyasına ötürülməsini nəzərdə tutur.
2019-cu ildən bəri Livanda davam edən dərin iqtisadi böhran səbəbindən vətəndaşlara gündə yalnız 4 saat dövlətə məxsus elektrik enerjisi verilir. Bu vəziyyət bir çox insanın bahalı özəl generator abunələrinə müraciət etməsinə səbəb olur.
Şayəstə
