ABŞ Venesuelaya təzyiqləri artırır. Tramp administrasiyası artıq Venesuela Prezidenti Maduronun bəzi ailə üzvlərini sanksiya siyahısına əlavə edib. Venesuelanın neft sektorunda fəaliyyət göstərən 6 gəmiçilik şirkətinə qarşı da sanksiyalar elan edilib.
Elchi.az xəbər verir ki, ABŞ administrasiyası Venesuela Prezidenti Maduroya təzyiqləri artırıb. Tramp administrasiyası Maduronun bəzi ailə üzvlərinə sanksiyalar tətbiq etmək qərarına gəlib.
ABŞ Maliyyə Nazirliyi Maduronun həyat yoldaşının 3 qardaşı oğluna və Venesuelanın neft sektorunda fəaliyyət göstərən 6 gəmiçilik şirkətinə qarşı sanksiyalar elan edib. Bəyanatda xatırladılıb ki, Maduronun həyat yoldaşının qardaşı oğlu 2015-ci ildə ABŞ-a kokain daşımağa hazırlaşarkən həbs edilib və məhkum edilib.
Bildirilib ki, 6 gəmi aldadıcı və təhlükəli gəmiçilik təcrübələri ilə məşğul olduqları və Maduro administrasiyasına maliyyələşdirmə təmin etdikləri səbəbindən sanksiya siyahısına əlavə edilib. ABŞ Prezidenti Tramp Ağ Evdə keçirdiyi mətbuat brifinqi zamanı quru əməliyyatlarının tezliklə başlayacağına işarə edib.
ABŞ neft tankerinə əl qoymuşdu
Çərşənbə günü ABŞ administrasiyası həmçinin İran İnqilab Keşikçiləri üçün neft daşıdığı səbəbi ilə bir Venesuela neft tankerini də ələ keçirib. Məsələ ilə bağlı danışan Ağ Ev sözçüsü tankerin ABŞ limanına aparılacağını və istintaqın davam etdiyini bildirib.
Bu arada, Birləşmiş Millətlər Təşkilatı ABŞ-ın Venesuela sahillərində tankeri ələ keçirməsindən sonra iki ölkə arasında artan gərginliklə bağlı narahatlığını bildirib.
Şayəstə
