Fələstin ABŞ prezidenti Donald Trampın təklif etdiyi Qəzza planını alqışlayıb və razılığa gəlmək üçün ABŞ, region ölkələri və digər tərəfdaşlarla işləməyə hazır olduğunu bəyan edib.
Elchi.az xəbər verir ki, Fələstin Rəhbərliyi (PA) verdiyi yazılı açıqlamada Trampın Qəzzada müharibəyə son qoymaq səylərini alqışlayıb.
Bəyanatda bildirilir ki, Fələstin ABŞ prezidentinin sülhə gedən yol tapacağına inanır və müsbət və konstruktiv qarşılıqlı fəaliyyət göstərərək Qəzza müharibəsinə son qoymaq üçün ABŞ, regional ölkələr və tərəfdaşlarla işləməyə hazırdır.
O qeyd edib ki, Qəzza ilə bağlı istənilən razılaşma “fələstinlilərin torpaq ilhaqının və köçkünlüyünün qarşısının alınması, beynəlxalq hüququ pozan birtərəfli hərəkətlərə son qoyulması, İsrailin Qəzzadan tamamilə çıxarılması, Şərqi Qüds də daxil olmaqla, Qəzza zolağı və İordan çayının qərb sahilindəki ərazi və qurumların birləşdirilməsini” əhatə etməlidir. Bəyanatda işğala son qoyulması və İsrail və müstəqil Fələstin Dövlətinin sülh, təhlükəsizlik və mehriban qonşuluq münasibətlərində yan-yana yaşamasını nəzərdə tutan iki dövlətli həll yoluna əsaslanan ədalətli sülhə yol açılmasının vacibliyi vurğulanıb.
Ağ Ev ABŞ prezidenti Trampın “Qəzza münaqişəsinə son qoyulması üçün hərtərəfli plan” adlı 20 bəndlik təklifini açıqlayıb.
İsrailin baş naziri Benyamin Netanyahu ilə Ağ Evdə keçirdiyi birgə mətbuat konfransında Tramp, planın hər iki tərəf tərəfindən qəbul ediləcəyi təqdirdə “müharibə”nin dərhal sona çatacağını, İsrailin Qəzzədən mərhələli şəkildə çəkiləcəyini, Qəzzada HƏMAS-ın rolu olmadan yeni proses başlayacağını və bütün məhbusların azad ediləcəyini bildirib.
Netanyahu da planın “müharibə məqsədlərinə çatdığını” ifadə edərək, dəstəyini ifadə edib.
Şayəstə Hüseynova
