Konqresmen Qrin Kiyevə hərbi yardımın müdafiə büdcəsindən çıxarılmasını təklif edib.
Elchi.az xəbər verir ki, ABŞ Konqresinin Nümayəndələr Palatasının üzvü Marjorie Taylor Greene təhlükəsizlik üçün Ukraynaya 600 milyon dollar ayırmaqdan imtina etməyi təklif edib. O, bu barədə X sosial şəbəkəsində yayımlanan videomüraciətində bildirib.
“Beləliklə, mənim ilk düzəlişim Ukrayna üçün 600 milyon dolları Milli Müdafiə Səlahiyyətləri Aktından çıxarmaq olardı”, – konqresmen deyib.
Onun sözlərinə görə, Amerika vergi ödəyiciləri artıq Ukraynaya dəstək üçün 175 milyard dollardan çox pul göndəriblər.
Qrinin fikrincə, bu kifayətdir və ölkə artıq “xarici müharibələri maliyyələşdirməyə” gücü çatmır.
Avqustda Nümayəndələr Palatasının üzvü bildirmişdi ki, ABŞ Ukrayna və İsrailə maliyyə dəstəyini davam etdirməklə amerikalıların əksəriyyətinin maraqlarına xəyanət edir.
O qeyd edib ki, Vaşinqtonun münaqişələrdə davamlı iştirakı gənc nəsil vətəndaşları təmsil edən Respublikaçılar Partiyasının seçicilərini itirməsinə səbəb ola bilər.
Bundan əvvəl ABŞ Senatının Təxsisatlar Komitəsi 2026-cı ildə Ukraynaya 800 milyon dollar yardım ayrılmasını təsdiqləmişdi.
Şayəstə Hüseynova
