Elmi fantastika reallığa çevrildi! Stanford Universitetində hazırlanmış beyin implantı insanların sadəcə düşündükləri sözləri aşkarlaya və onları cümlələrə çevirə bilər.
Alimlər insanların sadəcə düşündükləri sözləri aşkarlaya və səsləndirə bilən beyin implantı hazırlayıblar.
Stanford Universitetində hazırlanmış bu inqilabi cihaz beynin nitq mərkəzindən gələn siqnalları aşkar edir və süni intellekt proqramından istifadə edərək onları cümlələrə çevirir.
Elchi.az xəbər verir ki, araşdırmanın nəticələri “Cell” jurnalında dərc olunub.
Tədqiqatın aparıcı müəllifi doktor Erin Kunz, “İlk dəfədir ki, biz sadəcə nitq haqqında düşünəndə beyində nə baş verdiyini bu qədər aydın şəkildə anlaya bilirik”,- deyib.
Kunz, yeni kəşfin ciddi nitq və motor pozğunluğu olan şəxslər üçün təbii və daha sürətli ünsiyyətə qapı aça biləcəyini ifadə edərək, süni intellekt dəstəkli proqram təminatının istifadə edildiyini açıqlayıb.
ALS (amyotrofik yanal skleroz) və ya beyin sapı iflicinə görə danışa bilməyən dörd xəstə üzərində aparılan təcrübələrdə iştirakçıların beyninin nitq mərkəzinə yerləşdirilən elektrod massivləri (BrainGate sistemi) vasitəsilə siqnallar qeydə alınıb.
Xəstələrə müəyyən sözləri yüksək səslə söyləməyə çalışmaq və ya sadəcə onları səssizcə təsəvvür etmək tapşırılıb.
Beyin implantı fonem səviyyəsində (nitq səs vahidləri) siqnalları aşkar etdi. Daha sonra bu siqnallar süni intellektlə işləyən proqram vasitəsi ilə mənalı cümlələrə çevrildi.
Nəticələr göstərdi ki, səssizcə düşünülən sözlər üçün siqnallar daha zəif olsa da, sistem real vaxtda 74% dəqiq proqnozlar verə bilib.
Komanda istifadəçilərin məxfiliyinə dair riskləri də nəzərdən keçirdi, çünki sistem bəzən iştirakçıların istəmədən düşündükləri sözləri aşkar edə bilirdi. Bu vəziyyət üçün “aktivləşdirmə ifadəsi” adlı bir təhlükəsizlik tədbiri hazırlanmışdır.
Məsələn, “chitty chitty bang bang” ifadəsini düşünmək, cihazın aktivləşməsinə səbəb olub, qeyri-məlumat ötürmələrinin 98%-nin qarşısını alıb.
Stanford Universitetindən Dr. Frank Willett bu araşdırmanın nitq çətinliyi olan insanların həyatını tamamilə dəyişdirə biləcəyini vurğuladı:
“Bu texnologiya ilə bir gün yalnız daxili nitq vasitəsilə sürətli, səlis və təbii şəkildə ünsiyyət qurmaq mümkün olacaq.”
Nuranə Məmmədova
Son şərhlər