Soyqırımçı İsrailin hücumları və blokadası səbəbindən aclığın yaşandığı Qəzzada son 24 saatda aclıqdan ölənlərin sayı 6 nəfər artaraq 131-i uşaq olmaqla 367-yə çatıb.
Elchi.az xəbər verir ki, Qəzzada Səhiyyə Nazirliyindən edilən yazılı açıqlamada aclıqdan həyatını itirənlərlə bağlı son məlumat paylaşılıb.
Açıqlamada əlavə edilib ki, son 24 saat ərzində biri uşaq olmaqla daha 6 fələstinli aclıq və qida çatışmazlığı səbəbindən həyatını itirib.
Qəzza zolağında 2023-cü il oktyabrın 7-dən bu yana aclıqdan ölənlərin sayının 131-i uşaq olmaqla 367 nəfərə yüksəldiyi qeyd edilib.
Birləşmiş Millətlər Təşkilatının (BMT) dəstəklədiyi İnteqrasiya edilmiş Qida Təhlükəsizliyi Faza Təsnifatının (IPC) 22 avqustda Qəzzada aclıq elan etməsindən sonra 16-sı uşaq olmaqla 89 nəfərin aclıq və qida çatışmazlığı səbəbindən həyatını itirdiyi bildirilib.
IPC tərəfindən dərc edilən son hesabatda deyilir ki, “sübutlar 15 avqust 2025-ci il tarixinə Qəzza şəhərində aclığın “fəlakətli səviyyədə” olaraq bilinən 5-ci səviyyədə olduğunu təsdiqləyir”.
“22 aylıq amansız qarşıdurmadan sonra Qəzza zolağında yarım milyondan çox insan aclıq, yoxsulluq və ölümlə səciyyələnən fəlakətli şəraitlə üzləşib”, – IPC hesabatında qeyd edilir.
Qəzza “aclıqdan” ölür
İsrailin hücumları və humanitar yardımların daxil olmasını məhdudlaşdıran sıx blokada altında olan Qəzza zolağı geniş aclıq və su, dərman, tibbi ləvazimat və gigiyena materiallarının çatışmazlığı ilə humanitar fəlakət yaşayır.
Qəzza zolağında xüsusilə uşaqlar arasında aclıqdan ölüm halları artır. Yerli və beynəlxalq dairələr İsrailin “aclıq və susuzluqdan silah kimi” istifadə etdiyi barədə xəbərdarlıq edirlər.
Mülki infrastrukturu da məhv edərək Qəzzanın 88 faizini yerlə-yeksan edən İsrail ordusu, sığındıqları bölgələrdə tez-tez deportasiya əmrləri ilə didərgin düşmüş fələstinliləri hədəf alır.
Təxminən 2,3 milyon əhalisi olan Qəzzada İsrailin hücumları və deportasiya əmrləri nəticəsində didərgin düşmüş insanların sayının 2 milyona çatdığı, bir çox insanın isə dəfələrlə evlərindən didərgin salındığı bildirilir.
Əsas ləvazimatlardan məhrum olan məcburi köçkün fələstinlilər müvəqqəti çadırlarda və ya gigiyena ləvazimatlarının az olduğu, lavaboların qeyri-kafi olduğu və yoluxucu xəstəliklərin tüğyan etdiyi həddən artıq izdihamlı məktəblərdə sağ qalmaq üçün mübarizə aparır.
İsrail ordusu isə köçkünlərin çadırlarını və sığındıqları mülki sığınacaqları gündəlik hücumlarla bombalayır.
2023-cü il oktyabrın 7-dən bəri İsrailin Qəzza zolağına hücumları nəticəsində ən azı 63 633 fələstinli ölüb, 160 914 nəfər yaralanıb.
İsrailin atəşkəsi pozduğu martın 18-dən bu yana Qəzzaya hücumları nəticəsində 11502 nəfər həyatını itirib, 48900 nəfər isə yaralanıb.
Nuranə Məmmədova
Son şərhlər