İsrailin Qəzza zolağında sistematik aclıq siyasəti nəticəsində 17 yaşlı fələstinli Atif Əbu Xatir qida çatışmazlığından dünyasını dəyişib.
Elchi.az xəbər verir ki, səhiyyə mənbələrindən verilən məlumata görə, cəmi 25 kiloqram ağırlığında olan Atif ağır qidalanma və aclıqdan Qəzza şəhərindəki Hilu Beynəlxalq Xəstəxanasında dünyasını dəyişib.
Bildirilir ki, Atif iki həftə əvvəl sürətlə arıqladıqdan sonra qəfil səhhətində problemlər yaranıb və daha sonra xəstəxanaya yerləşdirilib.
Mənbələr aclıqdan ölən Atifin əvvəllər səhhətində problem olmadığını vurğulayıb.
Birləşmiş Millətlər Təşkilatının Uşaq Fondu (UNİCEF) dünən xəbərdarlıq edib ki, İsrailin davam edən müharibəsi və aclıq səbəbiylə vəziyyətin pisləşməsi səbəbindən Qəzzada uşaq ölümləri görünməmiş həddə çatıb.
Qəzzadakı Fələstin Səhiyyə Nazirliyi, son 24 saatda qeydə alınan 3 yeni ölümlə İsrailin 7 oktyabr 2023-cü ildən bu yana həyata keçirdiyi aclıq siyasəti nəticəsində ölənlərin sayının 92-si uşaq olmaqla 162-yə yüksəldiyini açıqlayıb.
Ümumdünya Ərzaq Proqramının məlumatlarına görə, Qəzzada yaşayan fələstinlilərin dörddə biri aclığa bənzər şəraitlə üzləşir və təxminən 100 min uşaq və qadın ağır qida çatışmazlığından əziyyət çəkir.
7 oktyabr 2023-cü ildə hücumlarına başlayandan bəri İsrail Qəzzaya humanitar yardımı əhəmiyyətli dərəcədə məhdudlaşdırıb. Martın 2-dən etibarən bütün yardım və tibbi keçidləri bağladı və aclığın yayılmasına və fəlakətli ölçülərə çatmasına səbəb oldu.
Yeganə
