ABŞ prezidenti Donald Tramp keçmiş prezident Barak Obamanı hədəf alıb. Tramp Obamanın “Rusiyanın 2016-cı il prezident seçkilərinə Trampın xeyrinə təsir etdiyi” anlayışını yaratdığını və bu “əsrin cinayəti”ndə bir çox şəxslərin şərik olduğunu iddia edib.
Elchi.az xəbər verir ki, ABŞ Milli Kəşfiyyatının direktoru Tulsi Qabbard 2016-cı il seçkiləri ilə bağlı yeni məxfi hesabatı dərc etdikdən sonra Prezident Tramp məsələni Truth Social hesabında paylaşıb.
Obamanın Rusiyanın 2016-cı il prezident seçkilərinə onun xeyrinə təsir etdiyi iddialarını irəli sürdüyünü iddia edən Tramp, “Əyri Hillari (Klinton), Yuxulu Co (Bayden) və bir çox başqaları əsrin bu cinayətində ortaqdır” dedi.
Tramp məsələ ilə bağlı “təkzibedilməz sübutların” olduğunu bildirib və vəziyyəti “ABŞ üçün ciddi təhlükə” kimi qiymətləndirib. Gabbard keçmiş prezident Barak Obama administrasiyasının bir neçə yüksək rütbəli rəsmisini “Rusiya 2016-cı il prezident seçkilərinə Trampın xeyrinə təsir edib” fikrini yaratmaqda ittiham etmiş və onların mühakimə olunmasını tələb etmişdi.
Açıqlanan hesabatda Milli Kəşfiyyatın o vaxtkı direktoru Ceyms Klapper, Mərkəzi Kəşfiyyat İdarəsinin (MKİ) direktoru Con Brennan və Federal Təhqiqatlar Bürosunun (FTB) direktoru Ceyms Komi kimi şəxslərin adları çəkilir.
Mərkəzi Kəşfiyyat İdarəsi həmçinin iyulun əvvəlində Rusiyanın 2016-cı il prezident seçkilərinə Trampın xeyrinə təsir göstərdiyinə dair iddialarla bağlı həmin il hazırladığı kəşfiyyat hesabatının prosedur aspektlərini nəzərdən keçirdiyini açıqlamışdı. Baxış belə nəticəyə gəldi ki, hesabat tələsik hazırlanıb və məmurlar həddən artıq işə qarışıblar və bunlar prosessual baxımdan anormaldır.
Şayəstə Hüseynova
