Azərbaycanın dağlıq ərazilərindən olan Quba rayonunun Qrız kəndində turizm sahəsində qadınların bilik və bacarıqlarını artırmağa yönəlmiş növbəti təlim keçirilib. Təlim “Alternativ” Kommunikasiya və Tədqiqatlar İctimai Birliyi tərəfindən Dövlət Turizm Agentliyinin donorluğu ilə həyata keçirilən “4 mövsüm Qrız” layihəsi çərçivəsində təşkil olunub. Təlimdə kəndin müxtəlif yaş qruplarından olan qadın sakinləri iştirak ediblər.
Tədbiri giriş sözü ilə açan “Alternativ” Kommunikasiya və Tədqiqatlar İctimai Birliyinin sədr müavini, “4 mövsüm Qrız” layihəsinin rəhbəri Jalə Quliyeva layihənin məqsəd və perspektivləri haqqında iştirakçılara məlumat verib: “Qrız kəndi Azərbaycanı ən unikal təbiətə və mədəniyyətə sahib bölgələrindən biridir. Biz bu layihə ilə qadınların potensialını üzə çıxarmaq, onları turizm təşəbbüslərində fəallaşdırmaq və kəndin dörd mövsüm boyunca turistlər üçün cəlbedici məkan olmasını təmin etmək istəyirik”. Jalə Quliyeva əlavə edib ki, layihənin əsas hədəfi kənddə turizm fəaliyyətlərini yalnız yay fəslində deyil, ilin bütün dövrlərində davamlı və dayanıqlı şəkildə həyata keçirmək üçün resurslar yaratmaqdır.
Qrız kənd sakini, təlim iştirakçısı Mehriban Seyidova öz çıxışında qadınların turizm fəaliyyətində iştirakı ilə bağlı şəxsi müşahidə və təcrübələrini bölüşüb. O, bildirib ki, kənddə qadınların evlərində hazırladıqları yeməklər, əl işləri və qonaqpərvərlik ənənələri yerli turizmin əsas dayaqlarındandır: “Biz kənd qadınları olaraq uzun illərdir ki, qonaqları qarşılayırıq. Amma bu, sistemli və gəlir gətirən turizm modelinə çevrilməyib. İndi biz öyrənirik ki, bacardığımız işləri daha effektiv təqdim etməklə həm kəndimizə, həm ailəmizə fayda verə bilərik. Dövlət Turizm Agentliyinin dəstəyi ilə icra olunan bu layihə sayəsində biz yerli resursları turizm xidmətlərinə çevirəcəyik”.
Təlimçi ekspert, turizm üzrə tanınmış mütəxəssis Vüqar Dərgahov kənd turizminin mahiyyəti, üstünlükləri və qarşıya çıxan əsas çətinliklər barədə geniş təqdimatla çıxış edib. O, kənd turizmini “həm sosial, həm də iqtisadi baxımdan dayanıqlı inkişaf aləti” kimi dəyərləndirib: “Kənd turizmi təkcə bir bölgənin təbiətinin nümayişi deyil, həm də mədəniyyətin, ailə dəyərlərinin və lokal iqtisadiyyatın yaşadılmasıdır. Qrız kəndinin resursları düzgün təqdimatla turizmin güclü tərəfinə çevrilə bilər”. Vüqar Dərgahov turizm xidmətləri sırasında yerli yeməklər, evdə gecələmə, bələdçilik, at gəzintisi, el şənlikləri və kənd həyatını yaşamaq kimi təcrübələrin təqdim olunmasının əhəmiyyətini vurğulayıb. O həmçinin, qadınların bu xidmətlərin əsas daşıyıcı qüvvəsi kimi çıxış edə biləcəyini bildirib.
Təlimdən sonra açıq müzakirə sessiyası keçirilib. İştirakçılar təlimçi ekspertdən konkret tövsiyələr alıblar. Sual-cavab zamanı yerli qadınlar ən çox qarşılaşdıqları problemləri – logistika, dil baryeri, maddi texniki təchizat və bazara çıxış imkanlarının məhdudluğunu vurğulayıblar. Təlimin sonunda layihə heyəti tərəfindən qeyd olunub ki, gələcək mərhələlərdə kəndin turizm resurslarının xəritələnməsi, qadınların iştirakı ilə pilot turizm xidmətlərinin sınaqdan keçirilməsi və kiçik təşəbbüslərin biznes planlarının hazırlanması və kəndin turizm xidmətlərinin vahid brendinin formalaşdırılması planlaşdırılır. Layihə rəhbərliyinin verdiyi məlumata görə, bu cür təşəbbüslər təkcə Qrız kəndinin deyil, ümumilikdə Azərbaycanın dağlıq ərazilərində yerləşən icmaların sosial-iqtisadi inkişafına töhfə verməyə yönəlib. Layihənin davamlılığı isə yerli icmaların öz təşəbbüslərinə sahib çıxması və qadınların bu təşəbbüslərdə lider rolunu üzərlərinə götürməsi ilə mümkün olacaq.
