“DəmirBank” Açıq Səhmdar Cəmiyyətinin lisenziyasının ləğv edilməsi bank sektorunda “yarpaq tökümünün” növbəti mərhələsinin başlaması kimi fikirlərə səbəb olub. Xüsusilə qeyd edilir ki, bank sektorunun daha ağır dövrü qarşıdadır. Ona görə ki, cari ildə bank sisteminin heç bir fundamental problemi köklü şəkildə həll olunmayıb. Əksinə, problemlər dondurularaq növbəti illərə keçirilib.
İqtisadçı-ekspert Qubad İbadoğlu Oxu.az-a açıqlamasında bildirdi ki, ötən 2 il ərzində 13 bankın bağlanması bank sektorunu böhrandan çıxara bilmədi:
“Hazırda bankların hər 3-dən 1-i ziyanla işləyir. Ötən il 13 bank, bu ilin ilk 9 ayında isə 12 bankın maliyyə nəticəsi zərərlə ifadə olunub. Beləliklə, son 1 il 9 ayda ən çox ziyan “Accessbank”da (127,5 milyon manat), “Bank of Baku”da (69,6 milyon manat), “Unibank”da (39,2 milyon manat), “Bank Respublika”da (37 milyon manat), “AGBank”da (24,2 milyon manat) və “Dəmirbank”da (20,3 milyon manat) qeydə alınıb. Bu il üçün zərəri ən az olan, səhmlərinin 25 faizi Avropa Yenidənqurma və İnkişaf Bankına malik olan “Dəmirbank”ın lisenziyası geri alınıb”.
Ekspert bildirir ki, cari ilin 3-cü rübünün nəticələrinə görə, aktivlərin dəyəri “Amrahbank”da 10,3 %, “Muğanbank”da 12,5 %, “Unibank”da 16,9 %, “Accessbank”da 19,2%, “Bank of Baku”da 21,1%, azalıb:
“Hesabat dövründə bank kapitalının dəyərini “Accessbank” 6,8%, “Amrahbank” 15,3%, “Bank of Baku” 19,9%, “AFB Bank” 21,4%, “AGBank” 21,9 %, “Unibank” 37,8% itirib.
Məlumat üçün qeyd edim ki, “Azərbaycan Beynəlxalq Bankı”, “Günay Bank” və “Naxçıvanbank” dövr ərzində məlumat açıqlamayıb. Böyük ehtimalla, hər 3 bankın cari vəziyyətini xarakterizə edən məlumatların gizlədilməsi onların göstəricilərinin pis olması ilə əlaqədardır. Qeyd olunan göstəricilər üzrə bankların vəziyyətinin qiymətləndirilməsi göstərir ki, hesabat açıqlamayan banklar da daxil olmaqla, yuxarıda adları sadalanan banklar 2018-ci ilə çətin maliyyə durumunda qədəm qoyurlar. Odur ki, bank xidmətindən istifadə edən istehlakçıların hüquqları qorunmadığı indiki böhranlı şəraitdə müştərilər vaxtında doğru qərarlar qəbul etmək üçün maliyyə savadını artırmalıdırlar”.
Son şərhlər