O, modern.az saytına deyib ki, görüş zamanı oğlunun bədənində allergiya olduğunu öyrənib: “İlkin keçmiş səhiyyə naziri Əli İnsanovla eyni həbsxanada qalır. Oğlumun allergiyasına görə Əli müəllim bir neçə dərman yazmışdı. Ötən görüşdə dərmanları alıb apardım. Xeyri oldu, indi yaxşı olduğunu deyir”.

Bakir Rüstəmzadə oğlunun saxlanma şəraitindən narazılığının olmadığını da deyib: “Deyilənə görə, mart ayında əfv sərəncamı imzalanacaq. Bu sərəncama İlkinin də adının düşəcəyini səbirsizliklə gözləyirik”.

Ötən ilin martında tutulan, Bakı İstintaq Təcridxanasında saxlanan “Nida”çı gənclər kütləvi iğtişaşları təşkil etmə cəhdində təqsirli biliniblər. O vaxt 8 “Nida”çı həbs olunub.

Bakı Ağır Cinayətlər Məhkəməsinin hökmü ilə Zaur Qurbanlı, Rəşadət Axundov, İlkin Rüstəmzadə 8 il, Məmməd Əzizov, Rəşad Həsənov 7 il 6 ay, Bəxtiyar Quliyev, Üzeyir Məmmədli 7 il, Şahin Novruzlu 6 il müddətinə azadlıqdan məhrum edilib. Dekabrın 16-da Bakı Apelyasiya Məhkəməsi “Nida”çı gənclər haqda hökmü qüvvədə saxlayıb.

Prezident İlham Əliyevin dekabrın 29-da imzaladığı əfv sərəncamı ilə Zaur Qurbanlı və Üzeyir Məmmədi azadlığa çıxıb. Bəxtiyar Quliyev (o, həbsdə olarkən “Nida”dan çıxıb) və Şahin Novruzlu isə prezidentin əfv sərəncamı ilə 2014-cü il oktyabrın 18-də azad olunublar.

Əli İnsanova gəlincə, virtualaz.org xatırladır ki, o, 2005-ci ilin oktyabrında dövlət çevrilişinə cəhdə hazırlıq ittihamı ilə həbs olunub. Amma sonradan rüşvət almaq, vəzifə səlahiyyətlərini aşmaq və bir sıra iqtisadi cinayətlər törətmək ittihaml ilə 11 il müddətinə azadlıqdan məhrum edilib.

2013-cü il martın 14-də Avropa İnsan Haqları Məhkəməsi Ə.İnsanovun İnsan Hüquqları Konvensiyasının 3-cü (işgəncələrin qadağan olunması) və 6-cı (ədalətli məhkəmə çəkişməsi) maddələri ilə zəmanət verilmiş hüquqlarının pozuldğunu tanıyıb.