Xarici ölkələrin qabaqcıl ali məktəblərində təhsil almaq əksər azərbaycanlı gəncin arzusudur. Bunun üçün böyük əmək sərf edən bəzi gənclər bir sıra hallarda istəklərinə nail olmağı bacarırlar. Bu gün istər dövlət, istərsə də özəl xətlə yüzlərlə tələbəmiz dünyanın tanınmış univeristetlərində təhsil alır.
Maraqlıdır, bəs xarici ölkələrdən Azərbaycana oxumağa gələn tələbələr hansı universitetlərimizi seçirlər?
Modern.az saytı bunu ayrı-ayrı universitetlərdən soruşub.
Azərbaycan Pedoqoji Universitetinin mətbuat və informasiya şöbəsinin müdiri Mansur İbrahimov bildirib ki, hazırda onlarda 176 türkiyəli tələbə təhsil alır. 63 tələbə isə hazırlıq şöbəsindədir. Magistraturada 1, doktoranturada isə 9 türkiyəli tələbə təhsil alır.
Azərbaycan Tibb Universitetinin (ATU) mətbuat katibi Günel Aslanova qeyd edib ki, indi bu elm ocağında 24 xarici ölkədən 868 tələbə təhsil alır. Əcnəbi tələbələr arasında 338 tükiyəli, 130 iranlı, 105 iraqlı, 2 ABŞ vətəndaşı, 10 nigeriyalı, 8 rusiyalı, 19 iordaniyalı, 13 suriyalı və başqa xarici ölkələrdən olanlar var. 20 nəfər rezidenturada, 4 nəfər doktronturada, 150-yə yaxın tələbə hazırlıq kurslarındadır.
Azərbaycan Dillər Universitetinin mətbuat xidmətinin rəhbəri Şəfa Kazımova bildirib ki, hazırda onlarda 100-ə yaxın xarici tələbə təhsil alır. “Qazaxıstan, Türkmənistan, Gürcüstan, Macarıstan, Ukrayna, ABŞ, Koreya, İran, Türkiyə, İspaniya, Almaniya, Yunanıstan, Belarus, Fransadan olan tələblər bizim universitetdə oxuyurlar. 1 nəfər magistraturada, qalanları isə bakalavr pilləsində təhsil alır”.
Bakı Dövlət Universitetinin (BDU) mətbuat xidmətinin rəhbəri Pərvanə İbrahimova deyib ki, hazırda bu elm ocağında bakalavr pilləsində 350, magistraturada 21, doktoranturada 33 nəfər xarici tələbə təhsil alır. “Onlar Türkiyə, İran, Nigeriya, Gürcüstan, Belarus, Qazaxıstan, Özbəkistan, Rusiya, Türkmənistan, Ukrayna, Çin, Koreya, Pakistan, Almaniya, Polşa, ABŞ-dandırlar. Onu da bildirək ki, BDU-da oxumaq istəyən əcnəbi tələbələrin sayı çoxdur. Sadəcə, universitetin yataqxanasının olmaması səbəbindən bu imkan məhdudlaşıb”.
Azərbaycan Dövlət Neft və Sənaye Universitetinin mətbuat xidməti Tahirə Qafarlı qeyd edib ki, 2015-2016-cı tədris ilində əsas ixtisas fakültələrinə dünyanın 11 ölkəsindən 58 nəfər əcnəbi vətəndaş qəbul olunub. “1-ci kursun əyani bakalavr pilləsində Tacikistan, Çin, Türkiyə, Yəmən, İraq, İran Özbəkistan və Rusiyadan olan 27 tələbə təhsil alır. Əyani magistraturada 10 nəfər, qiyabidə 2 nəfər əcnəbi təhsil alır. Ümumilikdə – əyanidə bütün kurslar üzrə 224 nəfər xarici tələbə təhsil alır ki, bunlardan da 35-i qiyabi bakalvr pilləsində oxuyur. 43 nəfər xarici magistrantımız, 6 nəfər doktorantımız var”.
Bakı Slavyan Universitetinin mətbuat xidmətinin rəhbəri Adil Əliyev bildirib ki, hazırda universitetdə 19 ölkədən 193 xarici tələbə təhsil alır ki, bunlardan 21 nəfəri hazırlıq kursunda, 22 nəfər magistraturada, 17 nəfəri doktoranturada, qalanları isə bakalvr pilləsində oxuyurlar.
“Bizdə əsasən Türkiyə, Ukrayna, Çin, Pakistan, Qırğızıstan, Qazaxıstan, İran, Özbəkistan, Türkmənistan, İtaliya, Venesuela, Suriya, Nigeriya, Gürcüstan, Makedoniya və s. ölkələrdən əcnəbi tələbələr oxuyur”.
Aytən ZƏHRA
Son şərhlər