Katolik dünyasının keçmiş ruhani lideri XVI Benedikt dekabrın 31-də vəfat edib. 2005-2013-cü illərdə Roma Papası olan XVI Benediktin səlahiyyət müddəti qalmaqallar və ittihamlarla dolu olub. Vəzifəsindən istefa verən keçmiş Papa Məhəmməd peyğəmbərlə bağlı qalmaqallı açıqlamaları ilə İslam dünyasında böyük reaksiyalara da səbəb olmuşdu.
2005-ci ildə Roma Papası seçiləndə onun 78 yaşı var idi. O, 1730-cu ildən bəri seçilmiş ən yaşlı papadır.
Elchi.az xarici mediaya istinadən XVI Benedikt haqqında bəzi faktları təqdim edir:
Uşaq istismarı qalmaqallarının mərkəzində idi
Əsl adı Josef Ratzinger olan Almaniya əsilli keçmiş Papa uşaq istismarı qalmaqallarının mərkəzində olub. Zorakılıq qurbanları ilə görüşən ilk Roma Papası XVI Benedikt uşaqlara qarşı zorakılıq ittihamı ilə 400 keşişi vəzifəsindən uzaqlaşdırıb. Lakin onun atdığı addımlar daha çox kilsənin reputasiyasını xilas etmək üçün qiymətləndirilib.
2022-ci ilin əvvəlində o, 1977-1982-ci illərdə Münhen arxiyepiskopu olduğu müddətdə uşaq istismarı ilə bağlı 4 ayrı hadisəyə göz yummaqda günahlandırılıb.
O, əvvəlcə ittihamları təkzib etsə də, ona yanlış məlumat verildiyini etiraf etməli olub.
Çirkli pulların yuyulması ittihamları
2012-ci ildə Vatikandan sızan məxfi sənədlər də keçmiş Papaya başağrısı yaratmışdı. Onun keçmiş eşikağası məxfi sənədləri oğurlayıb jurnalistə verməkdə təqsirli bilinib.
16-cı Benedikt də Vatikan Bankında çirkli pulların yuyulması ittihamlarına görə çətin vəziyyətdə idi. Vatikan Bankının keçmiş rəhbəri 2021-ci ildə mənimsəmə və çirkli pulların yuyulmasında ittiham olunaraq 8 il 11 ay həbs cəzasına məhkum edilib.
O, İslamı da hədəfə alıb…
Roma Papası XVI Benedikt Almaniyaya səfəri zamanı İslamı hədəf alan qalmaqallı açıqlama verib.
Məhəmməd peyğəmbər haqqında danışarkən işlətdiyi ifadələr böyük əks-səda doğurub. İslam dünyasının böyük qəzəbinə səbəb olan Papa sərt reaksiyalardan sonra ilk dəfə olaraq əksəriyyəti müsəlman olan Türkiyəyə səfər edib. Bu səfər Roma Papasının İslam dünyası ilə əlaqələri bərpa etmək səyi kimi qiymətləndirilib.
2013-cü ildə yaşını əsas gətirərək istefa verən keçmiş Papa 1415-ci ildən bəri vəzifəsini könüllü tərk edən ilk Papa olub.
Son şərhlər