Çempionlar Liqasının III təsnifat mərhələsinin ilk oyunu çərçivəsində keçirilən “Qarabağ” – “Zalsburq” matçını
izləyən AFFA prezidenti Rövnəq Abdullayev matç başa çatdıqdan sonra təmsilçimizin üzvlərini təbrik edib. Apasport.az saytının məlumatına görə, ardından qurum rəhbəri oyunla bağlı sualları cavablandırıb.
– Oyunla bağlı nə deyə bilərsiniz?
– Qələbə münasibəti ilə hər birinizi təbrik edirəm. Uzun müddət idi Tofiq Bəhramov adına Respublika stadionuna bu qədər azarkeş gəlmirdi. Komandamıza da təşəkkür edirəm ki, oyunları və qələbəsi ilə bizləri sevindirdi.
– “Valletta” ilə oyundan sonra stadionu erkən tərk etdiyinə görə, azarkeşlərdən narazı qaldığınızı açıqlamışdınız. Bu dəfə onlar sona qədər “Qarabağ”ı dəstəklədilər. Razı qaldınızmı?
– Əlbəttə, razı qaldım. Onlar bu gün həqiqətən də azarkeşlik etdilər. Qalır “Zalsburq” səddini aşmaq. Hazırlaşıb, onları mübarizədən kənarlaşdırmaq lazımdır. Bu gün birinci hissədə nümayiş etdirdiyimiz oyunu səfərdə hər iki hissədə göstərmək gərəkdir.
– Cavab oyununu izləmək fikriniz var?
– Vaxt tapsam, səfərdəki oyunu stadiondan izləməyə çalışacam.
– “Qarabağ”ın iki futbolçusu qırmızı vərəqə ilə cəzalandırıldı. Bununla bağlı fikrinizi bilmək istərdik.
– Məncə, Reynaldonun epizodunda qırmızı vərəqə yox idi. İlk qırmızıya gəldikdə, bu sevincdə irəli gəlirdi. Həmin epizodda əllə oynamağa ehtiyac yox idi. Ümumiyyətlə, əllə oynamaq futbolçuya yaraşan hal deyil.
– Komandamız pley-off mərhələsinə vəsiqə qazana bilsə, AFFA tərəfindən mükafatlandırılacaq?
– Əslində, elə fikrimiz klubların pley-off mərhələsini adlamsı və qrup mərhələsinə vəsiqə qazanmasıdır. Ötən həftə “İnter”in oyununda xoş olmayan halla qarşılaşdıq. Hakimin matçın əvvəlindəki kobud səhvi nəticəyə də təsir etdi. Bu oyundakı qərarların yanlış olduğunu deyə bilmərəm, amma referinin vərəqələrdən çox istifadə etdiyi aydındır. Buna görə fasilədən sonra komandamız ehtiyatlı oynamağa çalışdı.
– Cavab oyununda “Qarabağ”ın şanslarını necə dəyərləndirirsiniz?
– Şans var. Qurban Qurbanovla danışdım, qırmızı vərəqə alan futbolçuları əvəzləyəcək oyunçularının olduğunu bildirdi. Yaxşı olacağını düşünürəm.
– Bu günlərdə Türkiyənin “Qalatasaray” klubuna ARDNŞ-in sponsorluq edəcəyi ilə bağlı xəbərlər yayıldı. Bu həqiqətdirmi?
– Elə bir şey yoxdur. Yanlış məlumatdır.
Son şərhlər