“Sonuncu dörd günlük müharibədə dostumuzu və düşmənimizi tanıdıq. Əksər dünya mətbuatı xəyallarımızı suya düşürmədi, Rusiya mətbuatından başqa. Rusiyanın mətbuat orqanları birmənalı olaraq Ermənistanın tərəfini tutdular, açıq-aşkar ermənilərin xeyrinə yalan dezinformasiyalar yaydılar”.
Bunu yeni yaradılmış AXCP-nin sədri Razi Nurullayev deyib.
Partiya sədri qeyd edib ki, əksər Rusiya mətbu orqanlarında erməni əməkdaşlar var, ermənilərin söz sahibi olduğu “Lifenews” kimi kanallar var və bunun bir səbəbi Rusiya-Ermənistan dostluğudursa, digər səbəbi özümüzük: “Belə çıxır ki, bizim qabiliyyətli, bacarıqlı və uzaqgörən jurnalistlərimiz yoxdur ki, Rusiya mətbuat orqanlarına işə düzəlsinlər. Dövlət səviyyəsində onlara dəstək də göstərilməyib. Əslində, bunlar aysberqin görünən tərəfləridir. Görünməyən tərəfin də üzə çıxarılması və həyata keçirilməsi üçün bir sıra təkliflərim var. Birincisi, Rusiyada yaşayan, vətəndaşlığı olan kifayət qədər azərbaycanlı var. Onların vasitəsilə, Rusiyada mətbu orqanları yaratmaq olmazmı? Doğrusu, Rusiya qanunlarının əcnəbilərə mətbu orqanı yaratmağı qadağan edib-etmədiyi barədə məlumatım yoxdur. Əgər, yoxdursa, məsələ daha da asanlaşır. Hazır mətbuat orqanlarından bir neçəsini almaq olar. Son MTN əməliyyatında gizli xidmət orqanlarının 9 milyard oğurladığı barədə məlumatlar yayıldı. Bu qədər pulun yarısına Rusiyanın mərkəzi və regional mətbuatının yarısını almaq olardı. Elə məmur, elə biznesmen var ki, 10-15 milyon dəyərində 50-60 villası var, birini satsa, regional bir mətbu orqanı alar”.
“Vətən, vətən qışqırmaqla vətənpərvərlik olmur. Şəhidin yasında iştirak edib, şəkil çıkdirməklə, erməniyə lənət yandırmaqla vətənə sevgi olmur. Vətən üçün kimsə canını verib vətənpərvər olur, şəhid olur, kimsə də malından-pulundan keçib vətənpərvər olmalıdır” – deyən partiya sədri Rusiyadakı iş adamlarımıza səslənib:
“Şmotka da sat, kazino da aç, əyləncə mərkəzi də tik, mahnı da oxu, rəqs məktəbi, butiklər də aç, məşhur xanım müğənniləri də bir-iki gecəliyə qonaq et, amma vətənini, elini-obanı da düşün. Görürsünüz ki, rus mətbuatı Azərbaycana qarşı ədalətsizlik edir, siz də bu sahədə yardımçı olmağa çalışın. Sizlər elə mətbu orqanlarından da pul qazana bilərsiniz. Alın Rusiya televiziya və mətbu orqanlarını, yenilərini yaradın, azərbaycanlı jurnalistləri rus mətbu orqanlarına yerləşdirin. İkincisi, Azərbaycan hökuməti ciddi bir plan işləyib həyata keçirməli və hər il Rusiya universitetlərinin jurnalistika fakültələrinə yüzlərlə azərbaycanlı tələbə yerləşdirməlidir. Bu bizim gələcəyimizə qoyulan sərmayədir. Rusiyanın efir məkanında nə tanınmış rejissorumuz (Rüstəm İbrahimbəyov istisna), nə müğənnimiz, nə də artistimiz var. Amma, bolluca şmotka, kartof, meyvə satanımız var. Rusiya siyasətinin, mədəniyyətinin, incəsənətinin və ədəbiyyatının içinə adamlarımızı yeritmək vaxtıdır. Lobbi, diaspora belə qurulur. Ən yaxşı yol, azərbaycanlı tələbələrin Rusiya universitetlərində oxuması və elə orada qalaraq işləməsidir”.
Razi Nurullayev bildirib ki, Rusiyada daha çox politoloqa, tanınmış adamlara, incəsənət adamlarına və siyasətçilərə sərmayə yatırmaq lazımdır: “Düzdür, hakimiyyət bu sahədə müəyyən işlər görüb, amma nəinki yetərincə deyil, hətta çox səthidir. Dördüncüsü, Rusiyada kifayət qədər savadlı azərbaycanlımız var. Bu soydaşlarımızın mərkəzi, federal və regional səviyyədə dövlət qulluğuna girməsi, siyasətə qoşulması və digər dövlət qulluğu məsələsində çalışması üçün onlara dövlət səviyyəsində dəstək vermək gərəkir. Ümid edirəm ki, hökumət bu yazdıqlarım üzərində düşünəcəkdir”.
Son şərhlər