İstintaq komitəsi Rusiya cinayət məcəlləsinin 105-ci maddəsi ilə cinayət işi qaldırılıb. Şahidlər dindirildikdən sonra şübhəli şəxs müəyyənləşdirilib. Məlum olub ki, idmançı Canıyevə atəş açan şəxs Azərbaycan vətəndaşıdır və o, gizlənir. Onun haqqında axtarış elan edilib.

Qəribə hadisə isə idmançının ölümündən sonra baş verib. Azərbaycan diasporunun nümayəndələri Ramil Canıyevin yas mərasimi üçün “Bakinskiy dvorik” kafesinə yığışıblar. Bu zaman əraziyə polis əməkdaşları cəlb edilib. Polis personaldan başqa yasa yığışan hər kəsi saxlayıb. 200 nəfər yas iştirakçısı polis bölməsinə aparılıb.

Rusiya DİN Çelyabinsk vilayətinin bölməsi bildirir ki, “Malenkaya Qruziya” kafesində baş verən hadisədən məlumatlıdırlar. Amma öldürülən şəxsin əlaqələri və “Bakinskiy dvorik”də baş verən yas mərasimi barədə məlumatsızdırlar.

Saxlanılanlardan biri bildirib ki, baş veerən profilaktik tədbirə oxşamır: “Yas mərasimi idi. Polis hücum etdi, havaya atəş açdı. Dedilər ki, cinayətkarları axtarırlar. Gənc və yaşlılara aman vermədilər. İnsanları əşya kimi maşınlara yığıb apardılar. 200 nəfər apardılar. Hətta Canıyevin atasını da polisə apardılar. Saxlanılanların hamısı Rusiya vətəndaşıdır, sənədləri təqdim etməyə hazır idilər. İnsanların dərdi var, 25 yaşlı oğul itiriblər. Cinayətkarı axtarmaqdansa, yasa basqın edirlər. Sonra isə onlara hörmət edilmədiyi üçün təəccüblənirlər”.

Kafenin ofisiantı da bu sözləri təsdiqləyib: “OMON gəldi, atəş açmağa başladı. Zala soxulub hamını yerə uzadıb vurmağa başladılar. Mətbəxə soxulmadılar. Sadəcə baxıb çıxdılar. Telefonlara baxıb çəkilişləri silməyi əmr etdilər. Bir neçə nəfər etiraz etməyə cəhd etdi”.

Yasda iştirak edənlərdən biri də OMON-dan şikayət edib: “Oğlan ölüb, onun cəmi 25 yaşı var idi. Onun yasına yığışmışdıq. Polislər hücum edib heç nə izah etmədən bizi saxladılar. Məni vurmadılar, amma niyə saxlandığımızı da demədilər”.

Azərbaycan diasporunun Çelyabinskdəki qeyri-rəsmi liderləri iki həftə əvvəl müntəzəm olaraq kriminal “razborka”lara cəlb ediliblər. İlk dəfə onlar son dövrün ən böyük silahlı toqquşması olan “Malenkaya Qruziya”da üzə çıxdılar. Polis restoranda 90 nəfəri saxlamışdı. Hüquq-mühafizə orqanları isə sadəcə operativ-profilaktik tədbirlərdən danışırlar.

Amma Rusiya mətbuatı aydınlaşdırıb ki, söhbətə mütəşəkkil cinayətkarlıqla mübarizə idarəsinin sabiq əməkdaşı Andrey Çelişev də gəlib. O, FTX tərəfindən qadağan edilmiş “Həmrəylik” həmkarlar ittifaqının liderlərindən biridir. Bu ittifaq deputat Vitaliy Rılskinin “Kalinin ailəsi”nin və onun biznesmen dostlarının maraqlarını müdafiə edir. Onu həm də Çelyabinsk kriminal avtoriteti Vladimir Puzikov dəstəkləyir.

Digər tərəfdə isə oğru dünyasının ən nüfuzlu nümayəndələrindən sayılan, Azərbaycan diasporunun Uraldakı qeyri-rəsmi kuratoru Rəhman Abdullayev olub. Görüşdə marşrut taksi bazarının sərhədləri müəyyənləşdirilməli idi. Amma vəziyyət gərginləşdiyi üçün Çelişev polis çağıraraq arxa yolla aradan çıxıb. Məhz bu hadisələrin davamı olaraq diaspor nümayəndəsi, 25 yaşlı idmançı qətlə yetirilib.

Hüquq-mühafizə orqanları bildirir ki, “razborka”lar sərnişindaşıma bazarındakı sərhədlər ucbatından baş verir. Azərbaycan diasporu bu sahədə ən aktiv  oyunçudur və bazarı əldən vermək istəmir. Amma Canıyevin ölümündən sonra cavabın olacağı dəqiqdir…