Hər bir əməliyyatda risk var. Lakin az əməliyyat var ki, pasiyent baş verə biləcək bədbəxt hadisəyə görə məsuliyyət daşıdığını öz imzası ilə 
təsdiqləyir. Plastik əməliyyatlar məhz belələrindəndir. Buna baxmayaraq, cərrahiyyə əməliyyatı etdirənlərin sayı ildən-ilə artır. Özü də yalnız qadınlar yox, axına qoşulan kişilərin də faiz göstəriciləri yüksələn xətt üzrə inkişaf edir. Məsələn, Azərbaycanda 2006-cı ildə estetik gözəlliyini cərrah ixtiyarına buraxanların cəmi 20 faizini kişilər təşkil edirdisə, indi bu göstərici artaraq 40 faizi keçib.
Tabloid.az belə əməliyyata ehtiyac duyan məşhurları araşdırıb. Araşdırmamız göstərir ki, sənət adamları cərrah bıçağı altına “səhnə qurban tələb edir” devizi altında düşüb. Bu yolda həyatını itirənlər də olub, uğursuz əməliyyatların nəticələrinə qatlaşmalı olanlar da. Lakin belələrinin sayı azdır.
Sovet dövründə də əməliyyata gedən məşhurlar olub
Təhlükələrinə baxmayaraq, estetik əməliyyatlar son illərin dəbinə çevrilib. Dünyada artıq siyasətçilərin də müraciət etdiyi plastik əməliyyatlara Azərbaycanda sadə insanlar və sənət adamları maraq göstərir. Diqqətçəkən məqamlardan biri də indi sadə insanların da müraciət etdiyi belə əməliyyatlara hələ Sovet dövründən marağın olmasıdır. Məsələn, Sovet dövründə məşhur qiraət ustası Əminə Yusifqızı və müğənni Flora Kərimova həmin məşhurlardandır.
Brilliant gözəllik
Incə, zərif görkəmi ilə sevənlərinin rəğbətini qazanmış xalq artisti Brillant Dadaşova sahib olduğu gözəlliyin özünəməxsus olduğunu, sonradan qazanılan, dəyişdirilən hər hansı gözəllik əlaməti olmadığını israrla vurğulayır. Lakin onun da Allahın verdiyi gözəlliyə öz “əlavələri” olduğu şübhəsizdir. Müğənninin dodağına təbii piy vurdurduğu, sinəsinin, belinin, üzünün, hətta ayaqlarının formasını dəyişdiyi göz qabağındadır.
Köhnə üzünə qadağa qoydu
Plastik əməliyyatlarla üzünü başdan yaradan aktrisa Məleykə Əsədovaya baxan kimi onun da bir estetik cərrahın əlindən çıxdığı aydın görünür. Özünü dəyişdirmək üçün tərəddüd keçirmədən cərrah bıçağı altına yatan M.Əsədova bu mövzuda çox komplekslidir. Köhnə üzünü unutdurmaq üçün əlindən gələni əsirgəməyən M.Əsədova yaddaşlarda sadəcə yeni üzü ilə qalmaq istəyir. Odur ki, nəinki etdirdiyi əməliyyatlardan danışmağı sevmir, hətta köhnə lent yazılarının efirə verilməsindən də xoşlanmır. Bir sözlə, nə qədər gizlətməyə çalışsa da, həkimlərin əməyinin bəhrəsi onun burnunda, dodağında və üz dərisində hiss olunur.
Onun üzünü cərrah bıçağı da dəyişdirə bilmədi
Müğənni Rəqsanə isə keçirdiyi plastik cərrahiyyə əməliyyatlarını gizlətmir. O, indiyədək bədəninin müxtəlif yerlərində doqquz nəticəsiz əməliyyat keçirib. Rəqsanə İsmayılovanin keçirdiyi əməliyyatlarin əksəriyyətinin nəticəsiz olması müğənninin üzündəki qüsurlardan da aşkar görünür.
Mahnıları kimi, əməliyyatları ilə də gündəmdə qalmağı bacarır
Plastik əməliyyat keçirdiyini ictimaiyyətə ilk dəfə məhz Aygün Kazımova elan etdi. Onun hər əməliyyata gedişi və dönüşü ictimai hadisəyə çevrildi. Bununla gündəmdə qalmağı bacaran xalq artisti Aygün Kazımova təkcə burnunu üç dəfə əməliyyat etdirib. Dəfələrlə sinəsinin ölçülərini dəyişib, göz formasına müdaxilə edib. Liposaksiya yolu ilə artıq piylərdən də azad olan A. Kazımovanın keçirdiyi əməliyyatlar uğurla nəticələnib. Xatırladaq ki, A.Kazımova keçirdiyi əməliyyatlardan birini lentə də aldırıb. Həmin görüntülərdən onun “Tez gəl” klipində istifadə edib.
Toy qabağı gözəlləşmə
Gözəlləşmək üçün cərrah köməyindən ən son istifadə edənlərdən biri rəqqasə Oksana Rəsulovadır. O, repçi Elşad Xose ilə ailə qurmağa hazırlaşdığı bir vaxtda əməliyyat masasına uzandı. Populyar rəqqasənin toy qabağı gözəlləşmək qərarı onun dəyişən burnundan daha böyük maraq oyatdı. Burnunu əməliyyat etdirmək üçün Bakıdakı klinikalardan birinə müraciət edən rəqqasə nəticədən razı qaldı. Ancaq yeni burnu onun üçün heç uğurlu olmadı. Ailəsinin ömrü qısa oldu.
Kişilərin gözəllik sevdası
Dünya təcrübəsində olduğu kimi, Azərbaycan şou-biznesində də kişi müğənniləri arasında müxtəlif plastik əməliyyatlardan yararlananlar az deyil. Məsələn, uzun müddət əməliyyat olunduğunu gizlədən Nadir Qafarzadənin burnuna və dodağına əl gəzdirməsi göz qabağındadır. Müğənni dodağına silikonu ilk dəfə mərkəzi gözəllik salonlarının birində qoydurub, alnına botoks üsulu ilə vaksinlər vurdurub.
Xalq artisti Faiq Ağayev də hələ uzun illər bundan əvvəl burnunda əməliyyat etdirib. Müğənni növbəti dəfə sinə və qollarına silikon etdirmək üçün cərrah masasına uzanıb. Bu əməliyyatı boynundan atan F. Ağayev nədənsə, əməliyyat mövzusunda danışmaqdan imtina edir.
Son şərhlər