Tənzilə Rüstəmxanlı: “Əhməd Davudoğlu deyirdi ki, Orta Doğuda Türkiyənin xəbəri olmadan quş 
uçmaz; bəs necə olur ki, o boyda heykəl iki ay idi orada ucaldılmışdı?”
Diyarbəkirin Lice kəndindəki PKK qəbristanlığında terrorçu Mahsum Korkmaza heykəl qoyulması Türkiyədə iğtişaşlara səbəb oldu. Heykəlin açılışından sonra ölkə ictimaiyyətinin, eləcə də müxalifətin ciddi təpkisi məsələ ilə bağlı təcili məhkəmə çəkişməsinə səbəb olub.
MHP başqanı Dövlət Baxçalı bu haqda açıqlamasında türk şəhidlərinin sümüklərini sızladan bu hərəkət üçün AKP-nin məsuliyyət daşıdığını bildirib.
Avqustun 18-də Diyarbəkir Baş Prokurorluğunda açılan cinayət işi baxılması üçün məhkəməyə göndərilib. Məhkəmə terror təşkilatının təbliğatı olduğu üçün heykəli “suç əşyası” elan edib və dərhal yıxılması haqqında qərar çıxarıb.
Avqustun 19-da səhər saatlarında Türkiyə Silahlı Qüvvələrinin hərbçiləri qərarın icrası üçün bölgəyə gəldikdə, PKK terrorçuları ilə türk əsgərləri arasında silahlı toqquşma baş verib. Bu toqquşma nəticəsində bir terrorçu məhv edilib, 2 PKK-çı yaralanıb, bir əsgər şəhid olub.
Azəri-Türk Qadınlar Birliyinin rəhbəri Tənzilə Rüstəmxanlı “Yeni Müsavat”a deyib ki, Türkiyəyə 35 minə yaxın şəhid verdirmiş bir terror hörgütünün üzvlərindən birinə Türkiyədə heykəl qoyulmasına şərait yaradılması üzücü olmaqla yanaşı, heyrət yaradır. Heykəli qoyulan Türkiyəyə qarşı PKK savaşını ilk başlayan adamlardan biridir. Belə birisinə heykəl qoyulması şəhidlərə, türk xalqına hörmətsizlikdir: “Bu, ürək ağrıdan bir durumdur. Türkiyə dövlətinin İstihbaratı, jandarması, polisi, icra orqanları var. Bütün bunların gözləri qarşısında terror təşkilatının üzvünə heykəl qoyulur və guya iki aydır bundan xəbərləri yox imiş. Bundan xəbərlərinin olmaması ağlasığan deyil. Yəni Türkiyə bu qədərmi zəifdir? Əhməd Davudoğlu deyirdi ki, Orta Doğuda Türkiyənin xəbəri olmadan quş uçmaz. Bəs, necə olur ki, o boyda heykəl iki ay idi orada ucaldılmışdı, lakin hökumət orqanlarının xəbəri olmayıb? Axı bu, ağlasığan deyil. Bu hadisə o deməkdir ki, qardaş Türkiyədə bir qarmaqarışıqlıq yaşanır, kim nə istəyir onu edir. Mən bunu çox üzüntü ilə qarşılayıram”.
T.Rüstəmxanlı vurğuladı ki, heykəlin götürülməsi Türkiyə cəmiyyətinin, müxalif siyasi, ictimai qüvvələrinin haqlı təpkisi nəticəsində mümkün oldu: “Türkiyə xalqı bu məsələlərdə həssasdır. O heykəlin götürülməməsi mümkün deyildi. Təəssüf ki, həmin terrorçunun heykəli belə bir türk əsgərinin şəhid olmasına səbəb oldu. Heykəlin götürülməsinə qarşı PKK silahlı saldırılar düzənlədilər və bir əsgər şəhid oldu. Heykəlin ucaldılmasına ilk andan imkan verilməsəydi bəlkə də belə olmazdı”.
E.SEYİDAĞA
Son şərhlər