Elchi.az-ın ANS TV-ə istinadən məlumatına görə, ötən gün Bakı Ağır Cinayətlər Məhkəməsində tarzənin 
həyat yoldaşı və nəvəsinin ölümünə səbəb olan qəzanı törədən Xalid Mədətov 12 il müddətinə azadlıqdan məhrum edildi. Məhkəmə zalından birbaşa ümumirejimli cəzaçəkmə müəssisəsinə aparılan Xalid Mədətov həbsxanadan çıxdıqdan sonra 5 il avtomobil idarə etmək hüququndan da məhrum edilib.
Bu ilin mart ayından Zığ şossesindən, hava limanına gedən yolda sərxoş vəziyyətdə yüksək sürətlə avtomobil idarə edən X.Mədətov nəqliyyat vasitəsini Ağasəlim Abdullayevin oğlu Vüqarın atomobilinə çırpmışdı. Nəticədə tarzənin həyat yoldaşı və 3 yaşlı nəvəsi hadisə yerində dünyasını dəyişmişdi. Müxtəlif bədən xəsarətləri alan Ağasəlim Abdullayev, oğlu və gəlini isə uzun müddət bu hadisənin şokunu yaşadı.
Aparılan istintaq araşdırmaları zamanı içikili vəziyyətdə avtomobili idarə edən Xalid Mədətovun günahkar olduğu tam subuta yetirildi. Bu səbəbdən məhkəmənin qərarının nə olacağını öncədən duyan Mədətovlar ailəsi Abdullayevlər ailəsinə maddi təzminat ödəyərək cəzanın azaldılmasını istəsələr də tarzən onların təklifindən imtina etdi. Hətta zərərçəkən ailə qəza zamanı dəymiş ziyana görə məhkəməyə maddi təzminat istənilməsi ilə bağlı müraciət də etməyib.
Ailənin qızı Yeganə xanım düşünür ki, hec bir cəza, nə onun anasının, nə də ki, 3 yaşlı qardaşı oğlunun dərdini unutdura bilməz.
“Belə bir hadisəyə görə ömürlük həbs cəzası verilməli idi. Nə edək ki, bizdə belə bir qanun yoxdur. Prezidentimizə öz təşəkkürümüzü bildiririk”, deyə Yeganə xanım bildirdi.
Yeganə xanım hadisədən bir gün sonra Xalid Mədətovun atası Mübariz Mədətovun, bir neçə gün sonra isə xarici ölkələrin birində səfirlikdə işləyən qardaşının işdən kənarlaşdırılmasını Azərbaycan hökumətinin bu hadisəyə xüsusi diqqət göstərməsi ilə əlaqələndirir.
Xalid Mədətovun vəkili Samir İsayev isə hesab edir ki, Bakı Ağır Cinayətlər Məhkəməsinin cəzanın müddətinin çox təyin edib. Çünki, bu təqsirləndirilən şəxsin ilk məhkumluğu idi. Bu səbəbdən yüngülləşdırıcı hallar nəzərə alınmaqla Xalid Mədətova 9 il müddətinə həbs cəzası təyin edilməli idi. Hazırda məhkəmənin hökmündən Mədətovlar ailəsinin apellyasiya şikayəti verib-verməyəcəyi isə bəlli deyil.
Son şərhlər