“Fransa Cənubi Qafqazda Ermənistanın əli ilə növbəti münaqişənin başlamasının əsasını yaradır”.
Elchi.az xəbər verir ki, bu sözləri Ədalət, Hüquq, Demokratiya Partiyasının (ƏHD) sədr müavini, politoloq Niyaməddin Orduxanlı “Cebhe.info”-ya açıqlamasında deyib.
O bildirib ki, rəsmi Paris pulsuz şəkildə Ermənistana silah verir:
“Azərbaycanda bununla bağlı kifayət qədər məlumat var. Azərbaycan kosmosda olan peykimiz vasitəsilə hansı ölkənin Ermənistana nələr göndərdiyini görür. Ümumiyyətlə, Fransa münaqişənin alovlanmasında birmənalı şəkildə maraqlıdır. Üstəlik, sadəcə Fransanın deyil, Qərbin də bir sıra amillərə görə regionda marağı var. Onlar bu formada Cənubi Qafqaza gəlmək istəyirlər”.
Niyaməddin Orduxanlı qeyd edib ki, Qərb Ermənistanı silahlandırmaqla Rusiyaya qarşı da mübarizə aparır:
“Onlar Rusiyaya qarşı mübarizədə öndə olduqlarını göstərmək istəyirlər. Çünki Ermənistanın Rusiyaya təsir imkanları çox böyükdür. Yəni Ermənistan Rusiya üçün forpost ölkədir və onu yaradan da rus çarlığı olub.
Ona görə də Rusiya-Ukrayna müharibəsinin davam etdiyi məqamda İrəvanla Moskva arasında böyük narazılıq yaradaraq, tərəflər arasındakı əlaqələri kəsməyi hədəfləyirlər. Nəzərə almaq lazımdır ki, Nikol Paşinyan Qərbpərəst bir siyasətçidir və milyarder Corc Sorosun maliyyə dəstəyi ilə hakimiyyətə gəlib.
O, hazırda da Qərbin təsiri altındadır. Bu baxımdan, Paşinyan vasitəsi ilə münaqişəni alovlandırmağa və Azərbaycanla yenidən müharibə olmasına çalışan qüvvələr var”.
ƏHD-in sədr müavini vurğulayıb ki, ermənilər “xəstə” cəmiyyətdir:
“Onlar uzun illərdir “xəstəliyə” yoluxublar və “dənizdən dənizə Ermənistan” xəyalı ilə yaşayırlar. Çünki ermənilər ideoloji baxımdan virusa yoluxublar. Qərb isə belə təfəkkürdə olan bir xalqın maraqlarından istifadə edir. Hətta bəzən ABŞ-nin özünün açıq şəkildə demədiyini Fransanın əli ilə ortaya qoyur. Bu da bizə bəllidir. İndiki mərhələdə Fransa Azərbaycana təzyiq göstərməyə çalışır, Ermənistanı silahlandırır və hətta İranı da proseslərə qatmaq istəyir. Maraqlıdır ki, ABŞ və İran kimi bir-birinə qarşı olan qüvvələrin Ermənistan məsələsində maraqları üst-üstə düşür”.
Onun fikrincə, Qərb Rusiyanın çökməsinin onun maraqlarına uyğun olduğunu başa düşür:
“Çünki əslində Rusiya məsələsində ABŞ ilə Çin mübarizəsi gedir. Yəni Rusiyaya qarşı bu münasibət Kremlin Çinlə bağlı mövqeyindən irəli gəlir. ABŞ Rusiyanı Çinin yanında görmək istəmir. O baxımdan da, ABŞ Ukrayna və Qafqaz məsələsində bütün imkanları ilə Rusiyanın zəifləməsi üçün təsir göstərir. Əsas məsələ budur. Fransa da ABŞ-nin əlində alətə çevrilib.
Ümumiyyətlə, Fransada türklərə qarşı bir nifrət var və uzun illərdir Türkiyəni həzm edə bilmirlər. Həmçinin, Fransada islamafobiyanın olduğunu da qeyd etmək lazımdır. Düşünürlər ki, Ermənistan həm xristian ölkəsidir, həm də oradakı hakimiyyət Qərbin təsir dairəsindədir.
Ermənistan isə rus hərbçilərin ərazilərindən çıxararaq, onların yerinə Fransa və ABŞ əsgərlərini gətirmək istəyir. Hətta rəsmi İrəvan Qarabağda beynəlxalq missiya yerləşdirilməsinə nail olmaq istəyir”.
Son şərhlər