“Bakı metrosunun “Həzi Aslanov” stansiyasının çıxışında gecə saatlarında naməlum bir «budka» yerləşdiriblər. Yolumuzun böyük hissəsini bağlayıblar”. Bu sözləri musavat.com-a həmin ərazidə yaşayan sakinlər deyiblər.
Sakinlər bildirirlər ki, dünən gecə saatlarında naməlum şəxslər metal konstruksiyalı bu «budka»nı metronun çıxışında quraşdırıblar.
Adıçəkilən ərazidə olduğumuz müddətdə sakinlər bizi görən kimi şikayətlənməyə başladılar: «Mən dünən gecə saat 11-də buradan keçib, evimə getmişəm. Heç nə yox idi. Sonradan gətirib, qoyublar. Burada belə şey olmaz, axı… Yolumuzu bağlayıblar. Hələ bu «budka»nı nə məqsədlə istifadə edəcəklərini də bilmirik. Onsuz da həftəsonları burada bazar açırlar, bircə bu çatmırdı…
Kim nə istəyirsə, onu da edir. Kimin pulu varsa, qanunu da satın ala bilir. Hər yeri rahat şəkildə satırlar və alırlar. İndi də buranı satıblar? Ümumiyyətlə, buranı bazara çeviriblər. Həftəsonları yolu bağlayıb, bazar açırlar. Getdikcə yolun hər tərəfini satırlar. Evimizə gedib-gəlmək üçün zülm çəkirik. Metro stansiyasının girişini də zəbt etdilər. Daha hara qalıb? Bir gün yuxudan oyananda bu «budka»nı gördük, sabah da görərik ki, binamızı başqa yerə köçürüblər. Ya da evimizi başqasına satıblar. Hər şey ola bilər. Özbaşınalıqdır…»
Məsələ ilə bağlı “Bakı Metropoliteni” QSC-nin mətbuat xidmətinin rəhbəri Nəsimi Paşayevlə əlaqə saxladıq: «Bizdə də elə bir məlumat var. Kimsə gecə vaxtı gətirib, o «budka»nı oraya qoyub. Əməkdaşlarımız ərazidə olublar və maraqlanıblar. Amma «budka» sahibinin kim olduğunu hələlik öyrənə bilməmişik. «Budka» metroya giriş və çıxışa da mane olur. Ona görə də, biz də bu məsələni araşdıracağıq».
Xətai Rayon İcra Hakimiyyəti ilə də əlaqə saxladıq. İcra Hakimiyyətindən telefonumuza cavab verən növbətçi bildirdi ki, seçkilərlə bağlı qeyri-iş günü olduğu üçün bu haqda məlumat verə biləcək heç kim yoxdur.
Xatırladaq ki, adıçəkilən ərazi ilə bağlı bu ilk şikayət deyil. Məhəmməd Hadi küçəsi hər həftənin sonlarında hər iki tərəfdən qapadılaraq, bazara çevrilir. Bu da həmin ərazidə yaşayan sakinlərin haqlı etirazlarına səbəb olub. Bu haqda bir neçə dəfə sayt və qəzetimizdə xəbər vermişik. Amma hələ də Xətai Rayon İcra Hakimiyyəti şikayətlərə biganə yanaşmaqda davam edir.
Son şərhlər