Millət vəkilləri ölüm ayağında olan operatorun xilası üçün bir araya gəldilər

“Lider” televiziyasının keçmiş operatoru, ürək çatışmazlığından əziyyət çəkən 34 yaşlı Cavid Əliyevə yardım kompaniyası davam edir. Televiziya işçisinin təcili əməliyyata ehtiyacı olması barədə KİV-də yayılan xəbərlərdən, edilən müraciətlərdən dərhal sonra həmkarıları, dostları və bir sıra tanınmış şəxslər artıq Cavid Əliyevə yardım kompaniyasına qoşulublar.

“Qafqazinfo”ya daxil olan məlumata görə, millət vəkilləri  Adil Əliyev, Etibar Hüseynov, Sahib Alıyev, Aqil Abbas, Ülvi Quliyev, Zahid Oruc, Fərəc Quliyev, Fazil Qəzənfəroğlu və Qüdrət Həsənquliyev gün ərzində kampaniya təşkilatçılarına zəng vuraraq dəstək olduqlarını, maddi yadım edəcəklərini bildiriblər.

Qeyd edək ki, teleopreator Cavid Əliyev son iki ildə ailə üzvlərinin, yaxın qohumların və dostların maliyyə yardımı ilə Mərkəzi Neftçilər Xəstəxanasının Kardilogiya şöbəsində dəfələrlə müalicə kursları keçib. Bir neçə dəfə ölümlə üz-üzə gəlsə də həkimlərin müdaxiləsi nəticəsində onun həyatını xilas etmək mümkün olub. Lakin son bir ayda Cavid Əliyevin durumu o qədər pisləşib ki, artıq müalicələr də heç bir effekt vermir. Həkimlər təcili olaraq onun üzərində ürək transplantasiyası (ürəyin dəyişdirilməsi) əməliyyatı aparılmasının vacibliyini vurğulayıblar. Cavid Əliyevin dostları və həmkarları yardım üçün müraciət ediblər: “Lakin mövcud qanunvericiliyə görə ölkəmizdə bu tip əməliyyatların həyata keçirilməsi mümkün deyil. Digər tərəfdən xarici ölkələrdə reallaşdırılan ürək nəqli əməliyyatının dəyəri 100 min manat civarındadır. Bu məbləği ödəmək isə Cavid Əliyev və onun yaxınlarının imkanı xaricindədir. Təxminən bir həftə əvvəl səhhəti qəfildən pisləşən Cavid dostlarının yardımı ilə təcili Belorusiya Respublikasına aparıldı. Belorusiyanın Orqan Transplantasiyası İnstitutunun reanimasiya şöbəsinə yerləşdirilən Cavidə son diaqnoz qoyuldu – ömrünün sonuna sayılı günlər qalıb! Ürək nəqli vacibdir! Belorusiyalı həkimlər Cavidi ürək nəqli əməliyyatı üçün növbəyə yazıblar. Lakin bu əməliyyat üçün 100 min manat pul tələb olunur. Bu məbləği ödəmək faktiki olaraq mümkün deyil. Dəyərli dostlar! Əziz dostumuz, peşəkar televiziya işçisi, gözəl ailə başçısı, 3 uşaq atası olan Cavid Əliyevin həyatda qalması üçün hər birimiz əlimizdən gələni etməliyik. Bu məqsədlə bu gün Azərbaycan Beynəlxalq Bankında Cavid Əliyevin adına hesab nömrəsi açmışıq. Biz bütün dostlar adından çoxsaylı televiziya işçilərinə, mətbuat və ictimaiyyət nümayəndələrinə müraciət edirik! Cavidin yaşaması üçün – əməliyyat olunaraq yenidən normal həyata dönməsi üçün səfərbər olaq! Gəlin həmkarımızın həyatla ölüm dirim mübaizəsi apardığı bir zamanda onun yanında olaq, ona dəstəyimizi əsirgəməyək!

Bankın müxbir hesabı: AZ03NABZ01350100000000002944”.