Mən buna bir az Novruz nağılı kimi baxıram- Qulu Məhərrəmli

Srağagün Rusiya prezidenti Vladimir Putin milyonçuları başına yığıb az qala yalvardı ki, Avropa və Amerikadakı pullarınızı gətirin ölkəyə, sizə yuxuda görmədiyiniz güzəştlər tətbiq ediləcək. Politoloqlar və siyasi şərhçilər onun bu çağırışının heç bir əhəmiyyət kəsb etmədiyini, ağlı başında olan heç kimin pulunu Rusiya kimi riskli bir ölkəyə gətirməyəcəyini bildirir.

Siyasi şərhçi Qulu Məhərrəmli də Putinin özündən müştəbehliyini yersiz hesab edir. Elchi.az Moderator.az-a açıqlamasında analitik bildirir ki, Putinin müraciəti illüziyalardan qaynaqlanır:

“Ukrayna hadisələri və Qərblə qarşıdurma fonunda Rusiya cəmiyyətində şovinizm, kor millətçilik güclənib, əhalinin  nadanlığa meyilli olan hissəsində Rusiyanın gücü ilə bağlı illüziyaları xeyli artırıb. Şübhəsiz ki, bütün bunlar, üstəgəl hökumətin təşkil etdiyi “dəstək” mitinqləri indi özünü qəhrəman sayan prezident V.Putini də ruhlandırıb. Ona elə gəlir ki, həqiqətən Rusiyanın üzünü ağardan siyasət aparır və dünyanın müxtəlif ölkələrindəki imkanlı ruslar və ölkə içindəki milyonerlər onu birmənalı şəkildə dəstəkləyir. Putinin müraciəti, məhz belə illüziyalardan qaynaqlanır. Amma bu çağırışın heç bir effekti olmayacaq, çünki ağlı başında olan heç bir milyoner öz valyutasını perspektivsiz Rusiya bazarına gətirməz. Axı Rusiya iqtisadi məkan kimi əlverişsizdir, güvənli deyil, rublun da alıcılıq qabiliyyəti aşağıdır. Aydındır ki, bu pulları gətirtməkdə Putinin məqsədi rublun məzənnəsini, heç olmasa indiki səviyyədə saxlamaq istəyir. Amma xaricdəki  rus milyonerlərinin və ölkədəki oliqarxların Putinin çağrışı ilə bu ölkəyə pul gətirmələri ağlabatan deyil. Həm də axı hansı işgüzar adam yaxşı iqtisadi şəraiti olan ölkədən, xüsusən ofşor zonadan vəsaitini çıxarıb iqtisadi cəhətdən çökməkdə olan Rusiyaya gətirər? O ki, qaldı azərbaycanlı milyonerlərin öz pullarını ölkəmizə gətirib dövriyyəyə buraxmasına, mən buna bir az Novruz nağılı kimi baxıram…