Uzun müddətdir təhlükəsizlik böhranı ilə mübarizə aparan Ekvadorda ölkənin ən böyük narkotik şəbəkəsi liderlərindən olan Adolfo Macias Villamarın qaçmasından sonra başlayan gərginlik davam edir.
Elchi.az xəbər verir ki, gərginlik artmaqda davam edərkən TC Televiziya adlı kanala silahlı və maskalı bir qrup şəxs basqın edib.
İctimai kanalda canlı yayımlanan görüntülərdə silahlı şəxslərin televiziya kanalının əməkdaşlarını yıxaraq döydüyü görünür.
Sosial şəbəkələrdə paylaşılan görüntülərdə üzlərini maska ilə bağlayanların studiyadakıları girov götürdükləri və diktorun cibinə partlayıcı qoyduğu görünür.
Görüntülərdə qrupdan bəzilərinin müxtəlif partlayıcıları, o cümlədən qumbaraları kameraya göstərdiyi də əks olunub.
Ekvador Polis Xidmətinin direktoru Sezar Zapata televiziya studiyasına basqın edən silahlı şəxslərin hamısının saxlanıldığını bildirib.
Nə qədər adamın saxlanıldığı barədə məlumat verməyən Zapata, “Bu, terror aktı kimi qiymətləndirilməli bir hərəkətdir” -deyib.
Bu hadisə ölkənin ən böyük narkotik şəbəkəsinin liderlərindən biri olan Adolfo Macias Villamarın Ekvadorda həbsxanadan qaçmasından sonra baş verib.
Villamarın həbsxanadan yoxa çıxmasından sonra 60 günlük fövqəladə vəziyyət elan edilib.
Səlahiyyətlilər bütün ölkədə komendant saatı və gecə toplantılarını qadağan etmək qərarına gəliblər.
Ölkə mətbuatının yazdığına görə, fövqəladə vəziyyət qərarından sonra cinayətkar təşkilatlar çoxlu sayda polisi qaçıraraq onların maşınlarını yandırıblar.
Nuranə Məmmədova
Son şərhlər