“Bu gərginlik onunla bağlıdır ki, Paşinyan Qarabağa öz adamını rəhbər qoymaq istəyir…”

Yerevanla Xankəndi arasında gərgin münasibətlər Qarabağda qarşıdakı “prezident seçkiləri” ilə əlaqəlidir.

Virtualaz.org xəbər verir ki, belə mövqe ilə erməni politoloq Yervand Bozoyan “Sputnik Armenia” agentliyinə açıqlamasında çıxış edib.

“Təbii ki, Paşinyan hakimiyyətə gələndən sonra  güclənməyə çalışır. Seçkilərdən sonra o, parlamentdə çoxluğu əldə etdi. İndi isə məhkəmə hakimiyyəti üzərində nəzarəti ələ keçirməyə çalışır”-Bozoyan deyib.

 Politoloq qeyd edib ki, Qarabağ Ermənistanla sıx bağlıdır və Paşinyan üçün qəbuledilməzdir ki, orada onun “tərəfdaşı” olmayan kimsə hakimiyyət başında olsun.

Bozoyanın fikrincə Dağlıq Qarabağdakı rejimlə Ermənistan hakimiyyəti arasında gərgin münasibətlərin nəyə aparıb çıxaracağını təxmin etmək çətindir. Çünki Qarabağda bir-biri ilə mübarizə aparan siyasi qüvvələr Paşinyanla “üzvi bağlara” malik deyil.

Erməni politoloq qeyd edib ki, bir çoxları Paşinyanın adamı kimi Dağlıq Qarabağın keçmiş “baş naziri” Araik Arutyunyanı görürlər. Lakin onun fəaliyyətini və biznes-əlaqələrini nəzərə alanda Qarabağda mənfi reytinqi yüksəkdir.

“Birbaşa tərəfdaşı olmayan Paşinyan Arutyunyan üçün meydanı təmizləməyə çalışır, onun potensial rəqiblərini hədəfə götürür”-Bozoyan qeyd edib.

Politoloqun fikrincə ciddi təhlükə var ki, proses bu cür davam edib dərinləşsə olduqca acınacaqlı nəticələrə gətirib çıxara bilər.