Britaniyan nüfuzlu “Daily Mail” qəzeti və Bakıda tikiləcək möhtəşən otel

Britaniyanın nüfuzlu “Daily Mail” qəzeti Bakıda tikilən möhtəşəm hotel haqqında məqalə dərc edib.
Məqalə əmlak inşaatı sahəsində dünya liderlərindən sayılan ABŞ-ın “The Trump Organisation” şirkətinin rəhbəri Donald Trumpun açıqlaması əsasında hazırlanıb.
Yazıda vurğulanır ki, D.Trumpun qızı, şirkətin vitse-prezidenti İvanka Trump inşaatın gedişi ilə maraqlanmaq üçün paytaxt Bakını ziyarət edib. İ.Trump, həmçinin Bakı gecələrinin möhtəşəm görüntüsündən video-çarx da yayımlayıb.
İ.Trump açıqlamasında deyib: “Bu möhtəşəm bina yüksək səviyyəli zərifliyi əks etdirir, qeyri-adi memarlığı və müasir daxili dizaynı Xəzər dənizindən ilham alınaraq inşa olunur”.
Məqalədə, həmçinin, otelin memarlıq üslubu haqqında məlumat verilir. Bildirilir ki, 33 mərtəbəli hotel 119 qonaq otağı , 72 lüks yaşayış məskəni və 40 xidməti mənzil ilə təmin ediləcəkdir.
Hotel dizaynını Londonun “Mixity Design” şirkəti hazırlayıb.
Tikinti işlərini Azərbaycanın “Garant Holding” şirkəti həyata keçirir. Şirkətin idarə heyətinin sədri Anar Məmmədov açıqlamasında, “Trump Organisation” şirkəti ilə birgə çalışmaqdan məmnunluğunu ifadə edib. Bakı əhalisi və paytaxtı ziyarət edənlər üçün möhtəşəm hotelin tikilməsindən şad olduğunu diqqətə çatdırıb.
Hotelin açılışı 2015-ci ilin iyun ayına planlaşdırılıb.
Məqalədə vurğulanır ki, Azərbaycan dünyanın qədim ölkələrindən biri olduğu kimi, müasir tikililəri ilə dünya mədəni irsinə töhfələr verir.
Yeni tikiləcək hotel isə müasir Bakının göydələnlərinə qoşulacaq.