Jurnalist Taleh Şahsuvarlı xüsusi olaraq Strateq.az saytı üçün araşdırma aparıb. Araşdırmanın mövzusu 16 saylı Yasamal İkinci Seçki Dairəsinin deputatı, AMEA İnsan Hüquqları İnstitutunun direktoru Aytən Mustafayevanın oğlunun Dubaydakı biznesi olub. Məqalədə vurğulanır ki, deputatın oğlu Orxan Mustafayev Birləşmiş Ərəb Əmirliklərinin Dubay şəhərində İdeal Concept Group adlı şirkətin prezidentidir. Həmin qrupa daxil olan şirkətlərin ixtiyarında çox sayda yaxtalar və eksklüziv avtomobil studiyası var. Bundan başqa Orxan Mustafayevin şirkətləri məşhur italyan və alman firmalarının istehsal etdiyi qidaların- kolbasa, sosiska, pendir, şirə və s. satışı ilə məşğul olur.
Taleh Şahsuvarlının dünən Strateq.az saytında yayınlanan həmin araşdırması ölkədəki bir çox xəbər portallarında təkrar tirajlandırılıb. O cümlədən AXCP sədri Əli Kərimlinin nəzarətində olan Azadlıq qəzetinin internet versiyasında da araşdırma qısa ixtisarla yayınlanmışdı. Qəzetin Facebook səhifəsində də müvafiq link paylaşılmışdı. Ancaq hazırda həmin linkə- http://www.azadliq.info/118826.html- daxil olanlar “Deputat oğlunun Dubaydakı biznesi: Yaxtalar, eksklüziv maşınlar… və daha nələr, nələr” adlı araşdırmanı tapa bilmirlər. 08 Fevral 2016, saat 22:29 tarixdə “Azadlıq” qəzetinin interent saytında tirajlanan araşdırma səhifədən çıxarılıb. Bu barədə “Azadlıq” qəzetinin rəhbərliyi oxuculara heç bir izahat verməsə də, güman etmək olar ki, həmin araşdırmanın yayımı AXCP sədri Əli Kərimlinin göstərişindən sonra dayandırılıb. Çünki Əli Kərimlinin “Azadlıq” qəzetinin informasiya siyasətinə birbaşa rəhbərlik etdiyi bəllidir. Bu təqdirdə isə ortaya sual çıxır: Əli Kərimli ilə Aytən Mustafayeva arasında hansı sövdələşmə mövcuddur ki, AXCP sədri deputatı bu cür açıq dəstəklə qorumaqla məşğuldur? Ehtimal etmək olar ki, Aytən Mustafayeva ilə Əli Kərimlinin siyasi münasibətlərinin formalaşmasında və inkişafında keçmiş deputatların- Milli Şuranın sədri Cəmil Həsənlinin, yaxud həmin qurumun üzvü Gültəkin Hacıbəylinin rolu olub. Bütün bunları, yəni Əli Kərimli ilə gizli danışıqlar aparmasını Aytən Mustafayevanın Azərbaycanın siyasi hakimiyyətinə qarşı çıxması kimi dəyərləndirmək olar.
Son şərhlər