ABŞ Əl-Babın Türkiyə tərəfindən İŞİD-dən geri alınmasını və Türkiyənin dəstəklədiyi birləşmələrə hava dəstəyinin veriləcəyini açıqlayıb.
ABŞ müdafiə nazirliyinin mətbuat katibi polkovnik Ceff Deyvis deyib ki, Türkiyə Suriyanın şimalında əməliyyatlara başladığı gündən Çerablus, Çobanbey, Dabılın İŞİD-dən təmizlənməsi üçün hava dəstəyi və xüsusi təyinatlılarla dəstək olduq. Dabık alındıqdan sonra Türkiyənin dəstəklədiyi birləşmələr Əl-Baba yönəldilər. Biz bunu dəstəkləyirik və onların Əl-Babı İŞİD-dən geri almalarını istəyirik. Türk hökuməti və hərbçiləri ilə görüşlərimiz davam edir.
Bəzi ekspertlər bu açıqlamanın ABŞ-ın yeni administrasiyasının Türkiyə ilə münasibətləri yaxşılaşdırmağa hesablandığını bildirir.
ABŞ-Türkiyə münasibətləri və ABŞ-ın Türkiyəyə dəstək mesajını politoloq İlqar Vəlizadə Ölkə.Az-a şərh edib:
“Demək olar ki, ABŞ-Türkiyə münasibətlərində geri dönüm başlayıb. Burada bir məsələ var ki, şərti olaraq dəsək, qatar 2015-ci ildə yola salınıb. Artıq o qatar yolun yarısını qət edib. Bu bəyanat gedən qatarın arxasınca addım atmaq deməkdir.
Türkiyə bu günlərdə Astanada Rusiya və İranla danışıqlar aparır. Bu formatda Türkiyə Suriya probleminin həllinə qoşulub və bu istiqamətdə xeyli iş görür. Türkiyənin tərəfdaşları Suriya məsələsində bəllidir. ABŞ çalışır ki, vəziyyəti dəyişdirsin. Ona görə də belə addımlar atmağa başlayıb. Ancaq bu addımların real vəziyyəti nə qədər dəyişdirəcəyi böyük bir sualdır. İnanmıram ki, ABŞ-ın bu dəstəyi Türkiyə üçün hava, su kimi lazım olan bir dəstək idi. Düzdür, Türkiyə ABŞ-ın bu dəstəyindən yararlana bilər. Ancaq bu, həlledici bir dəstək deyil. Yaranmış vəziyyətə təsir etmir”.
ABŞ-ın Türkiyəyə qarşı atacağı gələcək addımlara gəldikdə isə politoloq bildirdi ki, ola bilər ki, mövcud formatda problem yaransa, Türkiyə nail olmaq üçün maneələrlə qarşılaşsa və bu maneələri aşmaq üçün ABŞ konkret addımlar atsa, onda vəziyyət dəyişə bilər:
“Düşünürəm ki, Türkiyə ABŞ-la bu məsələdə sıx münasibət qura bilər. Ancaq bunlar hamısı fərziyələrdir. İndiki vəziyyətdə baş verən prosesləri əks etdirmir.
ABŞ-ın yeni administrasiyasının atdığı bu addım bir mesajdır. Ancaq bu mesaj hal-hazırda vəziyyətə təsir etmir”.
Son şərhlər