Biz regionda sülhün və barışığın əldə olunması üçün istənilən ölkənin konstruktiv rolunu dəstəkləyirik. Türkiyə bunu edir.
Elchi.az xəbər verir ki, bu barədə ABŞ-ın Azərbaycandakı səfiri Li Litzenberqer brifinqdə bildirib.
O, Türkiyə və Ermənistanın artıq əlaqələrin normallaşması istiqamətində danışıqlara başladığını xatırladıb: “Biz bunu alqışlayırıq və dəstəkləyirik. İstərdik ki, daha sürətli proqress əldə olunsun. Və bunun həmçinin, Azərbaycan və Ermənistan arasında da baş verməsini istərdik. Türkiyə NATO müttəfiqidir və Türkiyənin müxtəlif regionlarda təmasları ilə bağlı rahatlığımız var”.
ABŞ səfiri, Türkiyənin İsveç və Finlandiyanın NATO-ya üzvlüyü ilə bağlı narahatlığına da toxunub. Səfir qeyd edib ki, bunu aradan qaldırmağın yolu tərəflər arasında dialoq və kommunikasiyadır:
“Bu üç ölkə artıq dialoqa başlayıb və narazılıqları müzakirə edir. Düşünürəm ki, bu irəliləyişə nail olmağın ən yaxşı yoludur.
Mən NATO-da xidmət etmişəm və danışıqların necə keçdiyini bilirəm. Ölkələrin fikir ayrılığını müzakirə etməsi normaldır, ancaq NATO-da vacib olan əsas element önəmli məsələlərlə bağlı bütün ölkələrin konsensus əldə etməsidir. Mən əminəm ki, bu məsələdə də konsensusa nail olunacaq”.
Son şərhlər