“Abbas Abbasovun Azərbaycan əleyhinə yönəlmiş fəaliyyəti 2013-cü ildə keçirilən prezident seçkiləri ərəfəsindən başlayıb”. “Olaylar”a açıqlamasında İnsan Hüquqları və Maarifçilik İctimai Birliyinin sədri Rafael Becanov belə deyib. R.Becanov A.Abbasovu arxasında müəyyən xarici siyasi dairələrin dayandığını deyib: “Hətta vaxtilə, “Milyaderlər İttifaqı” yarananda da Abbas Abbasovun bu məsələdə böyük aktivlik göstərdiyi və müxtəlif görüşlər, tədbirlər keçirərək, etdiyi hərəkətlərlə dediyi söz arasında böyük fərqlərin olduğu üzə çıxdı. “AzerRos”un son qurultaylarında da bu özünü bir daha göstərdi. Məlum oldu ki, artıq burada olan bəzi qüvvələr Abbas Abbasovun planlarından xəbərdardılar və onun hansı hərəkətələrə hesablanan addımlar atmasının dərinliklərini bilirlər. Bu da “AzerRos”da böyük parçalanma yaratdı, nəticədə o, qurumdan uzaqlaşdırıldı. Amma görünür, Abbas Abbasovun arxasında dayanan dairələr, onu bu hərəkəti etməyə təhrik edənlər yenidən onun fəallaşmasına rəvac veriblər. Bu təhrikdə onun özü də iştirakçı olmağa həvəslidir. İndi o Türkiyədə yeni variantlar axtarmaqla məşğuldur. Ümumiyyətlə, bu adamın fəaliyyəti birmənalı olaraq, Azərbaycanın əleyhinə yönəlib. Hər zaman Azərbaycanı sevdiyini deyən Abbas Abbasov həmişə əməllərilə sözü arasındakı fərqləri büruzə verib. Bu da onun arxasında dayanan güclərin iradəsinin ifadəçisi olması anlamına gəlir. Abbasovun Türkiyədəki fəaliyyəti də bu yöndədir. Amma Azərbaycanda heç bir dayağı olmayan, insanlar tərəfindən dəstəklənməyən, vəzifədə olduğu dövrdə insanların rəğbətini qazana bilməyən Abbas Abbasov nəzərdə tutulan planları nə reallaşdırmaq gücündədir, nə də ki, o planları həyata keçirməyi bacaran adamdır. Ona görə də, Abbas Abbasovun fəaliyyətindən əndişələnməyə dəymir. Amma bu adamın fəaliyyəti haqqında ictimaiyyətə məlumat vermək hər kəsin borcudur”.