Böhran və münaqişələrdən əziyyət çəkən insanlara ərzaq yardımı göstərən BMT-nin Ümumdünya Ərzaq Proqramı (ÜƏP) maliyyə çatışmazlığı səbəbindən Qəzza zolağındakı əməliyyatlarını təxminən üçdə bir azaldacaq.
Elchi.az xəbər verir ki, sənədə görə, təxminən 500 000 insan bu cür yardımdan məhrum olacaq.
2025-ci ilin oktyabrında İsrail və radikal Fələstinin HƏMAS hərəkatı arasında atəşkəs elan edildikdən sonra Ümumdünya Ərzaq Proqramı hər ay təxminən 1,6 milyon Qəzzaya yardım edir, onları ərzaq bağlamaları, un, çörək, isti yemək və pul köçürmələri ilə təmin edir. Bununla belə, 2026-cı ilin oktyabrından bəri ən həssas sakinlərdən yalnız 1,1 milyonu yardım alıb. Qida rasionu iki dəfə azaldılıb, gündə verilən isti yeməklərin sayı isə 250 mindən 150 minə enib.
ÜƏP öz işini davam etdirmək üçün əlavə maliyyəyə ehtiyac duyur. “Agentlik 2026-cı ilin oktyabrından 2027-ci ilin martına qədər növbəti altı ay ərzində Qəzza zolağında və İordan çayının qərb sahilində kritik əməliyyatlarını davam etdirmək üçün təcili olaraq 450 milyon dollar tələb edir”, – təşkilatın bəyanatında qeyd olunub.
Yardımın azalması fonunda Qəzza zolağında ərzaq təhlükəsizliyi ilə bağlı vəziyyət qeyri-müəyyən olaraq qalır. ÜƏP təxmin edir ki, təqribən 1,4 milyon insan – anklav əhalisinin 67%-i kəskin ərzaq çatışmazlığı ilə üzləşir. Təxminən 200.000 insan fövqəladə vəziyyətdədir və təcili yardıma ehtiyac duyur. Qış yaxınlaşdıqca, azaldılmış humanitar yardımlar ən həssas sakinlərin vəziyyətini pisləşdirə bilər.
Yeganə
