ABŞ-ın Nüvə Tənzimləmə Komissiyası (NRC) 50 il ərzində amerikalıların radiasiyaya məruz qalma səviyyəsini minimuma endirən və bütün dünyada tətbiq olunan mühüm təhlükəsizlik prinsipindən imtina etməyi təklif edib.
Elchi.az xəbər verir ki, bu barədə “Associated Press” (AP) agentliyi məlumat yayıb.
Hazırda atom elektrik stansiyaları, elmi-tədris müəssisələri və radioaktiv materiallardan istifadə edən digər obyektlər radiasiyaya məruz qalma səviyyəsini ağılabatan şəkildə əldə edilə bilən ən aşağı səviyyədə saxlamağa borcludurlar, bu standart ALARA prinsipi kimi tanınır.
NRC-nin bir təşəbbüsü çərçivəsində bu xüsusi prinsipdən imtina edilməsi təklif olunur; bununla belə, maksimum yol verilən radiasiya təsiri ilə bağlı müstəqil standart qüvvədə qalacaq. Belə doza hədləri həm işçi heyəti, həm də ətraf əhali üçün yol verilən radiasiya təsirinin yuxarı həddini müəyyən edir. Eyni zamanda, ALARA prinsipi tələb edir ki, radiasiya təsiri səviyyələri həmin hədlər daxilində qalmaqla, ağlabatan şəkildə əldə edilə bilən ən aşağı səviyyədə saxlanılsın.
Komissiya ALARA prinsipini əvəz etmək məqsədilə “mərhələli yanaşma” adlanan üsulu tətbiq etməyi planlaşdırır. Bu yanaşma, şirkətlərin öz işçilərinin məruz qala biləcəyi potensial radiasiya dozasından asılı olaraq həyata keçirməli olduqları bir sıra tədbirləri nəzərdə tutur. Jurnalistlər qeyd edirlər ki, radiasiya səviyyələri müəyyən edilmiş hədlərə nə qədər yaxınlaşarsa, təklif olunan sxem çərçivəsində tətbiq edilməli olan qoruyucu tədbirlər də bir o qədər sərt olar.
Agentlik qeyd edir ki, qaydalara yenidən baxılması ABŞ Prezidenti Donald Trampın ölkə daxilində nüvə enerjisi istehsalını artırmağa çalışdığı bir dövrə təsadüf edir. Bunun səbəbi məlumat mərkəzlərinin və süni intellekt texnologiyalarının genişlənməsi nəticəsində elektrik enerjisi istehlakının sürətlə artmasıdır.
Energetika Departamenti artıq ALARA prinsipinin tətbiqindən imtina edib, Nüvə Tənzimləmə Komissiyası (NRC) isə yaxın aylarda radiasiyadan mühafizə standartlarını yekunlaşdırmağı planlaşdırır. Qurumun sədri Ho Nie əmin edib ki, NRC təhlükəsizlik tələblərini yumşaltmır, sadəcə olaraq “qeyri-müəyyənliyi aradan qaldırır”.
Daha əvvəl məlumat verilmişdi ki, ABŞ Prezidenti Donald Trampın administrasiyası İranın nüvə obyektlərinə növbəti zərbə endirmək və bunun ardınca həmin respublikaya qarşı əməliyyatın uğurla başa çatdığını elan etmək barədə qərar verə bilər.
Yeganə
