“XXI Əsrin Qadınları” İB “Qaranlıqdan İşığa: İnsan Alverinə Qarşı Maarifləndirmə və Dəstək” layihəsi çərçivəsində Şamaxı Peşə liseyində maarifləndirici tədbir keçirib.
Elchi.az xəbər verir ki, tədbirdə İnsan Alverinə qarşı Mübarizə Baş İdarəsinin əməkdaşı Elvin İsmayılov, “XXI Əsrin Qadınları” İB-nin sədri, eyni zamanda sözügedən layihənin rəhbəri Mahirə Əmirhüseynova, Şamaxı Peşə liseyinin direktoru İsmayıl Tarverdiyev, liseyin müəllim və tələbə kollektivi iştirak edib.
Elvin İsmayılov tədbirdə çıxış zamanı insan alverinə qarşı mübarizənin istiqamətlərindən danışıb.
Layihə rəhbəri Mahirə Əmirhüseynova qeyd edib ki, insan alverinin potensial qurbanı ola biləcək həssas əhali qrupları ilə sosial işin aparılması və onların maarifləndirilməsi xüsusi əhəmiyyət daşıyır. Bu məqsədlə rəhbəri olduğun İB tərəfindən müxtəlif təhsil müəssisələrində və ictimai platformalarda mütəmadi maarifləndirici tədbirlər təşkil olunur.
Bundan başqa Mahirə Əmirhüseynova çıxışında sosial şəbəkələrdə, sosial platformalarda insanların aldadıcı vədlərlə bu yola təhrik olunması barəsində geniş maarifləndirici bilgilər verdi.
Tədbir çərçivəsində tələbələri maraqlandıran suallar cavablandırılıb, insan alveri ilə mübarizədə ictimai məlumatlılığın artırılmasının vacibliyi vurğulanıb.
Qeyd edək ki, “Qaranlıqdan İşığa: İnsan Alverinə Qarşı Maarifləndirmə və Dəstək” layihəsi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilir.
