Türkiyənin xarici işlər naziri Hakan Fidan Avropa İttifaqını tənqid edərək bildirib ki, Ankaranın böyük geosiyasi və iqtisadi potensialına baxmayaraq, Türkiyənin Aİ-yə üzvlük prosesi və Gömrük İttifaqının yenilənməsi faktiki olaraq dayanıb.
Elchi.az xəbər verir ki, bu barədə “TRT Haber” məlumat yayıb.
Vyanada avstriyalı həmkarı Beate Maynl-Rayzinger ilə keçirdiyi birgə mətbuat konfransında çıxış edən Fidan qeyd edib ki, əməkdaşlığın genişləndirilməsi ticarət dövriyyəsini əhəmiyyətli dərəcədə — 500 milyard dollara qədər artıra bilərdi. Lakin onun sözlərinə görə, buna Aİ-dəki “siyasi iradə çatışmazlığı” mane olur.
Nazir Türkiyənin regional təhlükəsizlikdəki rolunu və cari qlobal böhranları nəzərə alaraq, üzvlük məsələsinin niyə hələ də həll olunmadığı sualını ortalığa qoyub.
“Əgər Türkiyə şərtləri yerinə yetirirsə, Aİ tərəfindən onu qəbul etməyə hazır olduqlarına dair aydın bir siyasi bəyanat verilməlidir. Təəssüf ki, belə bir iradə itirilib”, — deyən nazir, 2000-ci illərin sonunda qəbul edilən və inteqrasiya prosesini ləngidən qərarları xatırladıb.
Fidan vurğulayıb ki, Aİ daxilindəki institusional çətinliklərə baxmayaraq, Ukraynadakı müharibədən tutmuş Yaxın Şərqdəki vəziyyətə və Avropanın təhlükəsizliyi məsələlərinə qədər regional böhranlar səbəbindən əməkdaşlıq zəruridir.
O həmçinin qeyd edib ki, Türkiyə ilə Aİ arasında ticarət dövriyyəsi artıq 250 milyard dollara yaxındır və demək olar ki, balanslaşdırılmış vəziyyətdədir. Gömrük İttifaqının yenilənməsi isə iqtisadi əlaqələri xeyli gücləndirə bilər.
“Məqsədimiz münasibətləri daha yüksək səviyyəyə çıxarmaqdır”, — deyə o əlavə edib.
Məryəm
