Tesla, İlon Maskın şirkəti avtomobil istehsalçısından süni intellekt və robototexnika sahəsində liderə çevirmək strategiyası çərçivəsində əsaslı xərclərini əhəmiyyətli dərəcədə artırmağı planlaşdırır.
Elchi.az xəbər verir ki, bu barədə “Bloomberg” məlumat yayıb.
Şirkət bəyan edib ki, 2026-cı ildə əsaslı xərclər (capex) 25 milyard dolları keçəcək — bu, əvvəlki illə müqayisədə demək olar ki, üç dəfə çoxdur və əvvəlki 20 milyardlıq proqnozdan yuxarıdır. İlon Mask investisiyaların “çox ciddi şəkildə artırılacağını” vurğulayıb.
Vəsaitlərin istehsalın genişləndirilməsinə, humanoid robot Optimus-un hazırlanmasına, süni intellekt layihələrinə və Cybercab da daxil olmaqla avtonom nəqliyyatın inkişafına yönəldilməsi planlaşdırılır. Eyni zamanda, Teslanın ənənəvi avtomobil biznesi son iki ildə tənəzzül nümayiş etdirir.
Analitiklər qeyd edirlər ki, xərclərin artımı şirkətin ambisiyalarının yüksək maliyyə tutumunu əks etdirir və sərbəst pul vəsaitlərinin hərəkəti (free cash flow) üzrə gözləntiləri aşağı sala bilər.
Buna baxmayaraq, Tesla birinci rübdə gözləniləndən daha yüksək mənfəət əldə etdiyini bildirib və bir sıra bazarlarda tələbatın bərpası əlamətlərinin olduğunu bəyan edib. Lakin energetika istiqaməti gəlirlərin azaldığını göstərib.
Şirkət həmçinin robotaksi və yeni məhsulların, o cümlədən Semi və Megapack enerji saxlama sistemlərinin inkişafı planlarını təsdiqləyib. Bununla belə, Mask robotaksidən əhəmiyyətli gəlirin 2027-ci ildən tez olmayacağını gözləyir.
Məryəm
