Təxminən yeddi ton kütləsi olan iri bir meteorit ABŞ-ın Ohayo ştatı üzərində Yer atmosferinə daxil olub. Kosmik obyekt saatda təxminən 72 min kilometr sürətlə hərəkət edərək atmosferdə parçalanıb və güclü gurultu yaradıb. Bir çox sakin bu səsi partlayışla səhv salıb.
Elchi.az xəbər verir ki, bu barədə “AP News” nəşri məlumat yayıb.
Meteorit ilk dəfə Eri gölü üzərində, təxminən 80 kilometr hündürlükdə qeydə alınıb. Kosmik obyektin diametri təxminən 1,8 metr olub. O, atmosferin yuxarı qatlarında 55 kilometr məsafə qət edərək Ohayo ştatının şimal hissəsi üzərində parçalanıb. Parlaq alov topu Viskonsindən Merilendə qədər bir neçə ştatın sakinləri tərəfindən müşahidə edilib.
Amerika Meteor Cəmiyyətinin məlumatına görə, hadisə səhər saat 9 radələrində baş verib və meteorit adi gözlə görünüb ki, bu da belə hadisələr üçün nadir haldır.
Kosmik obyektin parçalanması zamanı təxminən 250 ton trotil ekvivalentində enerji ayrılıb. Bölgə sakinləri güclü uğultu eşidib, Milli Meteoroloji Xidmətin əməkdaşları isə hətta vibrasiya hiss ediblər.
Milli Meteoroloji Xidmət zərbə dalğasının qeydə alındığını təsdiqləyib. Tapılan fraqmentlər barədə hələlik məlumat yoxdur, lakin mütəxəssislər kiçik qalıqların yer səthinə çatdığını istisna etmirlər.
Məryəm
