Misirin Qəzza sərhədində qurduğu səhra xəstəxanası tamamlanmaq üzrədir

Misir İsrailin hücumu altında olan Qəzza zolağında yaralılar üçün sərhəddə səhra xəstəxanası yaradır.
Elchi.az xəbər verir ki, Əl-Əhram qəzetinin xəbərində, İsrailin 25 gündür davam edən hücumları nəticəsində yaralanan fələstinlilərin müalicəsi üçün Şimali Sinay Əyalət Sağlamlıq Müdirliyinin sərhəddə qurduğu səhra xəstəxanasının tamamlanmaq üzrə olduğu bildirilib. 
Şimali Sinay valiliyinin baş katibi Usamə əl-Qandur da qeyd edib ki, fələstinli yaralılara icazə verilərsə, Misirdəki xəstəxanalar onları qəbul etməyə və müalicə etməyə hazırdır.
Qandur yaralıların yoldaşlarının Şeyx Züveyd və Əl-Ariş şəhərlərində yerləşdirilməsi üçün 3 yerin ayrıldığını və onlara lazımi xidmətlərin göstəriləcəyini bildirib.
Şimali Sinay valisi Əbdülfadil Şuşa cümə axşamı dərc etdiyi bəyanatda Şeyx Züveyd şəhərində səhra xəstəxanasının yaradılmasına başlandığını, Bi’r əl-Abd şəhərində isə daha bir səhra xəstəxanasının yaradılmasının planlaşdırıldığını qeyd edib.

Şayəstə Hüseynova