“Azərbaycan istər Avropa İttifaqı (Aİ), istərsə də Rusiya, bir sözlə, bütün vasitəçilik təkliflərinə müsbət reaksiya verir. Lakin nəzərə almaq lazımdır ki, ölkəmizin indiyə qədər əldə etdiyi bütün uğur məhz Aİ vasitəsilə baş verib”.
Bu fikirləri Elchi.az-a açıqlamasında siyasi analitik Turab Rzayev avqustun 31-də Avropa Şurasının prezidenti Şarl Mişelin vasitəçiliyilə Azərbaycan və Ermənistan liderləri İlham Əliyevlə Nikol Paşinyanın Brüsseldə baş tutacaq növbəti görüşünü şərh edərkən bildirib.
4 dəfə Brüssel görüşünün baş tutduğunu xatırladan analitikin sözlərinə görə, həmin görüşlərin hər birində yenilik əldə edilib:
“Zəngəzur dəhlizi ilə bağlı dəmir yolu xəttinin çəkilməsi, delimitasiya və demarkasiya məsələləri, sərhədlərlə bağlı komissiyanın yaradılması, Azərbaycanın ərazi bütövlüyünün tanınması və.s məqamlarda irəliləyiş olub. Hər zaman Brüsseldə faktiki olaraq real nəticələrlə üzləşmişik. Rusiyada isə onlarla görüş keçirilsə də, ortada real nəticə olmayıb. Əlbəttə ki, Azərbaycan bütün sülh çağırışları və təklifllərinə açıqdır. Bu baxımdan, Rusiya tərəfinin də təkliflərinə müsbət cavab veririk, yəni Rusiya yenə onlarla görüş keçirsə, gedəcəyik. Ancaq real nəticəli görüşlər Brüsseldə olduğu üçün düşünürəm ki, Azərbaycan üçün də Aİ-nın vasitəçiliyi xüsusi önəm daşıyır. Ölkəmiz münaqişənin gələcəkdə həllini Brüsselin vasitəçiliyində görürük. Amma digər görüşlərə də qapılar bağlanmır, lakin həmin görüşlər sadəcə simvolik xarakter daşıyır”.
Yeganə
Son şərhlər