Prezident İlham Əliyev “Dövlət icbari şəxsi sığortası sahəsində idarəetmənin təkmilləşdirilməsi ilə bağlı bəzi tədbirlər haqqında” Azərbaycan Respublikası Prezidentinin 2021-ci il 18 may tarixli 1340 nömrəli Fərmanında dəyişiklik edilməsi barədə fərman imzalayıb.
Elchi.az fərmanın mətnini təqdim edir:
“Dövlət icbari şəxsi sığortası sahəsində idarəetmənin təkmilləşdirilməsi ilə bağlı bəzi tədbirlər haqqında” Azərbaycan Respublikası Prezidentinin 2021-ci il 18 may tarixli 1340 nömrəli Fərmanına (Azərbaycan Respublikasının Qanunvericilik Toplusu, 2021, № 5, maddə 447, № 12, maddə 1406; Azərbaycan Respublikası Prezidentinin 2022-ci il 18 iyun tarixli 1718 nömrəli Fərmanı) aşağıdakı məzmunda 2.3.4-cü və 2.3.5-ci yarımbəndlər əlavə edilsin:
“2.3.4. idarəetmə xərclərinə;
2.3.5. qanunla müəyyən edilmiş digər istiqamətlərə;”.
***
Prezident İlham Əliyev Azərbaycan Respublikası Prezidentinin “Azərbaycan Respublikası İpoteka və Kredit Zəmanət Fondunun yaradılması və fəaliyyətinin təmin edilməsi ilə bağlı bir sıra tədbirlər haqqında” 2017-ci il 25 dekabr tarixli 1760 nömrəli və “Elektron ipoteka və kredit zəmanət” sistemi haqqında Əsasnamə”nin təsdiq edilməsi barədə” 2018-ci il 1 may tarixli 30 nömrəli fərmanlarında dəyişiklik edilməsi haqqında fərman imzalayıb.
Fərmanda deyilir:
1. “Azərbaycan Respublikası İpoteka və Kredit Zəmanət Fondunun yaradılması və fəaliyyətinin təmin edilməsi ilə bağlı bir sıra tədbirlər haqqında” Azərbaycan Respublikası Prezidentinin 2017-ci il 25 dekabr tarixli 1760 nömrəli Fərmanında (Azərbaycan Respublikasının Qanunvericilik Toplusu, 2017, № 12 (I kitab), maddə 2328; 2018, № 5, maddə 897, № 8, maddə 1690; 2019, № 1, maddə 60, № 3, maddələr 411, 416, № 6, maddə 1014, № 12, maddə 1923; 2021, № 5, maddə 434) aşağıdakı dəyişikliklər edilsin:
1.1. 3.2-ci bəndə “sahibkarların” sözündən sonra “manatla emissiya etdikləri istiqrazlar üzrə öhdəliklərinə və” sözləri əlavə edilsin;
1.2. həmin Fərmanla təsdiq edilmiş “Azərbaycan Respublikasının İpoteka və Kredit Zəmanət Fondunun Nizamnaməsi” üzrə:
1.2.1. 1.1-ci və 2.1-ci bəndlərə “sahibkarların” sözündən sonra “manatla emissiya etdikləri istiqrazlar üzrə öhdəliklərinə və” sözləri əlavə edilsin;
1.2.2. 2.2.2-ci yarımbəndə “kreditlərə” sözündən sonra “, habelə manatla emissiya etdikləri istiqrazlar üzrə öhdəliklərinə” sözləri əlavə edilsin;
1.2.3. 2.2.4-cü yarımbənd aşağıdakı redaksiyada verilsin:
“2.2.4. təminat verdiyi öhdəliklər üzrə sahibkarlıq subyektlərində monitorinqlərin aparılmasını təmin edir;”.
2. Azərbaycan Respublikası Prezidentinin 2018-ci il 1 may tarixli 30 nömrəli Fərmanı (Azərbaycan Respublikasının Qanunvericilik Toplusu, 2018, № 5, maddə 898, № 10, maddə 1991; 2019, № 6, maddə 1014; 2020, № 11, maddə 1355; Azərbaycan Respublikası Prezidentinin 2022-ci il 2 avqust tarixli 1782 nömrəli Fərmanı) ilə təsdiq edilmiş “Elektron ipoteka və kredit zəmanət” sistemi haqqında Əsasnamə”də aşağıdakı dəyişikliklər edilsin:
2.1. 1.1-ci bənddən “Azərbaycan Respublikası İpoteka və Kredit Zəmanət Fondunun (bundan sonra – Fond) vəsaiti hesabına ipoteka kreditlərinin və ipoteka kreditləri üzrə təminatların, sahibkarların manatla aldıqları kreditlər (bundan sonra – sahibkarlıq kreditləri) üzrə təminatların və sahibkarlıq kreditlərinə hesablanmış faizlərin bir hissəsinə dövlət büdcəsinin vəsaiti hesabına subsidiyaların (bundan sonra – faiz subsidiyaları), habelə yaşayış sahələrini satmaq öhdəliyi ilə kirayəyə verilməsi məqsədi ilə” sözləri çıxarılsın;
2.2. 1.3-cü bənddə “Fondun” sözü “Azərbaycan Respublikası İpoteka və Kredit Zəmanət Fondunun (bundan sonra – Fond)” sözləri ilə əvəz edilsin;
2.3. 2.1.2-ci yarımbəndə “sahibkarlıq krediti” sözlərindən sonra “, yaxud manatla emissiya etdiyi istiqrazlar üzrə öhdəliklərinə təminat” sözləri əlavə edilsin;
2.4. 6.1.1-ci yarımbənddə “habelə sahibkarlıq kreditləri üzrə” sözləri “sahibkarların manatla emissiya etdikləri istiqrazlar üzrə öhdəliklərinə və sahibkarlıq kreditlərinə (bundan sonra – sahibkarların öhdəlikləri)” sözləri ilə əvəz edilsin;
2.5. 6.1.3-cü yarımbənddə “sahibkarlıq kreditləri” sözləri “sahibkarların öhdəlikləri” sözləri ilə əvəz edilsin;
2.6. 6.1.7-ci, 6.1.8-ci, 8.3.4-cü yarımbəndlərdə və 10.3-cü bənddə “sahibkarlıq kreditləri” sözləri “sahibkarların öhdəlikləri” sözləri ilə əvəz edilsin;
2.7. 6.3-cü bənddə “Sahibkarlıq kreditləri” sözləri “Sahibkarların öhdəlikləri” sözləri ilə əvəz edilsin;
2.8. 6.4-cü bənddə “Sahibkarlıq kreditləri üzrə öhdəliklərin” sözləri “Sahibkarların öhdəliklərinin” sözləri ilə əvəz edilsin.
***
Prezident İlham Əliyev Azərbaycan Respublikasının İpoteka və Kredit Zəmanət Fondu tərəfindən sahibkarların öhdəliklərinə təminatın verilməsi mexanizminin təkmilləşdirilməsi və “Azərbaycan Respublikasının İpoteka və Kredit Zəmanət Fondunun fəaliyyətinin təmin edilməsi haqqında” Azərbaycan Respublikası Prezidentinin 2017-ci il 29 noyabr tarixli 1691 nömrəli Fərmanında dəyişiklik edilməsi barədə fərman imzalayıb.
Fərmanda deyilir:
1. Azərbaycan Respublikasının İpoteka və Kredit Zəmanət Fondu (bundan sonra – Fond) sahibkarların manatla aldıqları kreditlərə münasibətdə kredit portfelinin təminatı mexanizmi üzrə, həmçinin istiqrazlar üzrə emitentlərin (sahibkarların) öhdəliklərinə Fondun təminat verməsi qaydalarını beş ay müddətində təsdiq etsin və bu barədə Azərbaycan Respublikasının Prezidentinə məlumat versin.
2. “Azərbaycan Respublikasının İpoteka və Kredit Zəmanət Fondunun fəaliyyətinin təmin edilməsi haqqında” Azərbaycan Respublikası Prezidentinin 2017-ci il 29 noyabr tarixli 1691 nömrəli Fərmanında (Azərbaycan Respublikasının Qanunvericilik Toplusu, 2017, № 11, maddə 2030, № 12 (I kitab), maddə 2330; 2018, № 5, maddə 901, № 10, maddə 1991, № 12 (I kitab), maddə 2592; 2019, № 5, maddə 857, № 12, maddə 1923; 2020, № 5, maddə 541; 2021, № 9, maddə 986) aşağıdakı dəyişikliklər edilsin:
2.1. həmin Fərmanla təsdiq edilmiş “Sahibkarlar tərəfindən manatla alınan kreditlərə təminat verilməsi Qaydası” üzrə:
2.1.1. 3.2.2 – 3.2.4-cü yarımbəndlərdə “30 (otuz)” sözləri “60 (altmış)” sözləri ilə əvəz edilsin;
2.1.2. 4.2.4-cü yarımbənddə “85” rəqəmləri “90” rəqəmləri ilə əvəz edilsin;
2.1.3. 4.6-cı bənddən “və yalnız bir dəfə” sözləri çıxarılsın;
2.1.4. 5.2.4-cü yarımbənd aşağıdakı redaksiyada verilsin:
“5.2.4. müvəkkil bank zəmanət üçün müraciət etdikdə, bu Qaydanın 5.2.4-1-ci yarımbəndində nəzərdə tutulan sənədləri elektron sistem vasitəsilə Fonda təqdim etməlidir. Hər hansı sənəd üzrə məlumatların elektron sistem vasitəsilə əldə edilməsi mümkün olmadıqda, borcalan həmin sənədi müvəkkil banka təqdim etməlidir. Müvəkkil bank təqdim olunmuş sənədin surətini elektron sistemdə həmin gün yerləşdirməlidir.”;
2.1.5. aşağıdakı məzmunda 5.2.4-1-ci yarımbənd əlavə edilsin:
“5.2.4-1. Zəmanət almaq üçün müvəkkil bank aşağıdakı sənədləri Fonda təqdim etməlidir:
1. kreditin və zəmanətin verilməsinə dair qeydlər, habelə bankın daxili kredit reytinqi modelinin nəticəsi göstərilməklə müvəkkil bankın səlahiyyətli orqanının qərarı;
2. borcalanın maliyyə və əmlak vəziyyətini əks etdirən sənədlər və məlumatlar;
3. borcalanın təsis sənədləri (fiziki şəxs olduqda – şəxsiyyətini təsdiq edən sənəd) və VÖEN-i;
4. borcalanın nizamnamə kapitalında 25% və daha çox iştirak payı olan fiziki şəxslərin, habelə kredit üzrə təminat vermiş fiziki şəxslərin (zaminlərin, girov (ipoteka) qoyanların və s.) şəxsiyyətini təsdiq edən sənədlər;
5. borcalanın hüquqi şəxs olan qanuni təmsilçisi, nizamnamə kapitalında 25% və daha çox iştirak payı olan hüquqi şəxslər, həmçinin kredit üzrə təminat vermiş hüquqi şəxslər (zaminlər, girov (ipoteka) qoyanlar və s.) barədə dövlət reyestrindən çıxarış;
6. borcalanın müvəkkil banka aidiyyəti olan şəxs olmadığını təsdiqləyən və müvəkkil bankın səlahiyyətli nümayəndəsinin imzaladığı sənəd.”;
2.1.6. 5.3-cü bənddə “5.2.4-cü” sözləri “5.2.4-1-ci” sözləri ilə əvəz edilsin;
2.1.7. 6.1.1-ci yarımbənddə “Azərbaycan Respublikasının Maliyyə Bazarlarına Nəzarət Palatasının (bundan sonra – Palata)” sözləri “Azərbaycan Respublikası Mərkəzi Bankının (bundan sonra – Mərkəzi Bank)” sözləri ilə əvəz edilsin;
2.1.8. 6.2-ci, 6.3-cü və 10.4-cü bəndlərdə ismin müvafiq hallarında “Palata” sözü ismin müvafiq hallarında “Mərkəzi Bank” sözləri ilə əvəz edilsin;
2.1.9. 8.6-cı bəndin birinci cümləsinə “sonrakı” sözündən sonra “ayın ilk” sözləri əlavə edilsin;
2.1.10. 10.1-ci bəndin birinci cümləsində, 10.2-ci bənddə və 10.3.2-ci yarımbəndin birinci cümləsində “10” rəqəmləri “20” rəqəmləri ilə əvəz edilsin;
2.1.11. 10.8-ci bənddə “2 (iki)” sözləri “1 (bir)” sözləri ilə əvəz edilsin;
2.1.12. 11.3-cü bənd aşağıdakı redaksiyada verilsin:
“11.3. Fondun İdarə Heyəti hər bir müvəkkil bank üzrə limiti Fondun Himayəçilik Şurası tərəfindən təsdiq olunmuş daxili təsnifləşdirmə modelinə əsasən müəyyən edir.”;
2.2. həmin Fərmanla təsdiq edilmiş “Azərbaycan Respublikasının İpoteka və Kredit Zəmanət Fondunda kredit reytinqi sisteminin və digər risk menecmenti alətlərinin tətbiqi Qaydası”nın 7.1-ci bəndinin cədvəlinin “Risk kateqoriyası” sütununda “85” rəqəmləri “90” rəqəmləri ilə əvəz edilsin;
2.3. həmin Fərmanla təsdiq edilmiş “Sahibkarlar tərəfindən manatla alınan kreditlərə hesablanmış faizlərə görə subsidiya verilməsi Qaydası” üzrə:
2.3.1. 5.2-ci bəndə “vaxtda” sözündən sonra “və ya daha sonra ayrıca” sözləri əlavə edilsin;
2.3.2. 5.7-ci bəndə “birlikdə” sözündən sonra “və ya faiz subsidiyası daha sonra verildiyi halda ayrıca” sözləri əlavə edilsin.
Son şərhlər