“Lənkəranda açılışını etdiyimiz Amerika Guşəsi ilə Azərbaycanda fəaliyyət göstərən guşələrin sayı 7-yə çatdı. Bu il biz Azərbaycanda 2 yeni Amerika Guşəsinin açılışını etmişik”.
Elchi.az xəbər verir ki, bunu ABŞ-ın Azərbaycandakı səfiri Li Litzenberqer Lənkəran Universitetində Amerika Guşəsinin açılışında deyib.
O, guşələrdən birinin Şəki şəhərində açıldığını xatırladıb: “Mən Azərbaycanın hansı bölgəsinə gedirəmsə, orada təbiət gözəlliklərindən, insanların qonaqpərvərliyindən və istiqanlılığından, eyni zamanda, yerli ləziz təamlarından dadmaqdan zövq alıram”.
Səfir bildirib ki, ABŞ Azərbaycandakı digər tərəfdaş qurumlar, ANAMA ilə birlikdə Azərbaycan ərazilərinin minalardan təmizlənməsi işlərinə fəal şəkildə kömək edir.
“ABŞ Azərbaycan ərazilərinin minadan təmizlənməsi və insanların minalardan zərər görməməsi üçün minatəmizləmə fəaliyyətlərinə 500 min min ABŞ dolları vəsait ayırıb və bu həftə minatəmizləmə mövzusunda Azərbaycan hökuməti beynəlxalq konfrans keçirib. Konfrans iştirakçıları bu yaxınlarda Ağdama səfər ediblər və qeyd edim ki, Dövlət Departamentinin iki nümayəndəsi Vaşinqtondan səfər edərək həmin konfransda iştirak edib. Böyük məmnuniyyətlə bildirirəm ki, ABŞ-ın Marşal İrsi İnstitutu (Marshall Legacy Institute) Azərbaycan hökuməti ilə minaların aşkarlanması üçün minaaxtaran itlərin verilməsi barədə razılığa gəlib. Ümumilikdə Azərbaycana 300 belə itin verilməsi nəzərdə tutulur, bu vaxta kimi isə 20 belə it Azərbaycan tərəfinə təqdim edilib. Bu itlərin mina aşkarlama təlimləri çox bahalı bir fəaliyyətdir. Bir itin təlimi 25 000 ABŞ dollarına başa gəlir, çünki itlərin ən bahalı təlimi məhz budur. Azərbaycan hökuməti bu itlərin Azərbaycana verilməsi və təliminin cəmi xərclərinin üçdə bir hissəsini və ya təxminən yarı hissəsini öz üzərinə götürüb. Yerdə qalan hissəsi isə ABŞ hökuməti tərəfindən həyata keçiriləcək. Azərbaycanda minaların təmizlənməsinə böyük ehtiyac var. Azərbaycan dünyada ərazisinin minalarla çirklənməsinə görə 10 ən çox çirklənmiş ölkədən biridir. Mən çox şadam ki, ABŞ ilə yanaşı digər beynəlxalq tərəfdaşlar da Azərbaycanın bu humanitar ehtiyacına öz köməklərini göstərirlər”, – diplomat qeyd edib.
Son şərhlər