Hələ yaxın keçmişdə Donald Tramp ABŞ prezidenti seçiləndə, özümə söz verdim ki, möcüzələr dünyasında baş verənlərə artıq heyrətlənməyəcəm. Ta ki bir gün sevdiyim aktyora böyük şəhərin məhəbbəti darlıq edənə qədər…
Son aylar ətrafında söz-söhbət səngiməyən Mister Ze hamının diqqət mərkəzindədir. Gözəllərin vətəni Ukraynanın bəzi rəylərə görə ən yaraşıqlı kişisi, artıq ilk kişisi, artıq ən birinci adamı…6-cı prezidenti.
Əslində prezidentliyin bir addımlığındadır Vova. Ona görə haqqında daha rahat, yazıram, beton divarlar hörmürəm.
Artıq bir neçə aydır ki, Vladimir Zelenskinin adı nəinki komediya həvəskarlarının, eləcə də siyasət aləminin dilindən düşmür. Məşhur şoumen, aktyor, ssenarist 2018-ci ilin son gecəsi ürəyində arzu tutub yatır ki, böyüyəndə prezident olum. Gecə röyasına qurbanolduqları girir. Səhər oyanıb yuxusunu Ukraynaya danışır. Xalq da onu güldürən oğlunun üzünü güldürməyə qərar verir. “Xalqın xidmətçisi” partiyasının liderini ölkə başçısı edir.
Məlumatı olmayanların nəzərinə çatdırım ki, 2015-cı ildə efirə çıxan “Sluqa naroda” (Xalqın qulu) teleserialında Vova kasıb müəllimdən ölkənin prezidentinə çevrilir. Xalq ilk dəfə kinoda da olsa, adi mənzildə yaşayan, ictimai nəqliyyatla işə gedib-gələn rəhbər görür. Mister Ze etiraf edir ki, serial çəkiləndə, belə bir ciddi addım atmaq onun ağlının ucundan da keçmirdi. Amma əsas nəticədir. 2017-ci ildə şoumenin rəhbərlik etdiyi “Kvartal Studiyası-95” şirkətinin vəkili “Xalqın qulu” siyasi partiyasını qeydiyyatdan keçirir.
2018-ci il yerini 2019-a verəndə isə digər kanallar prezident Poroşenkonun xalqa təbrikini yayımlayarkən, “1+1” telekanalı Zelenskinin prezidentlik sevdası haqda çıxışını təqdim edir. Bu ilin 21 yanvar tarixində isə Vova sənədlərini Mərkəzi Seçki Komissiyasına təqdim edir.
Bu gün Zelenskinin Ukraynada bir neçə evi, torpaq sahələri var. Hətta xanımı ilə birgə Britaniyada mənzil də alıblar. Zelenski cütlüyü bahalı saatları, zinət əşyalarını çox sevir. Üstəlik bir neçə şirkətin, qiymətli sənədlərin sahibidirlər. Elə tək 2017-ci ildə xalqın qulunun gəliri 1 milyon yarım qrivenə bərabər oldu.
Vova xalqını əmin edir ki, cəmi bir seçim müddətinə prezident olacaq. Hətta ilk qəbul edəcəyi qanun hakimiyyət üçün öhdəliklər tərtib edən xalq idarəçiliyi qurulacaq. Zelenski həmçinin prezidentin toxunulmazlığı haqda qanuna dəyişiklik olunacağını da vəd edir. Müəllimlərə sanballı maaş, rüşvətxorlara isə eyni ağırlıqda cəza söz verir. Hə, bir də deyir, prezident olduğu müddətdə kommunal evlərdə yaşayan nənələr dərmanlarına bəs etməyən təqaüdün ümidinə qalıb infarktdan ölməyəcəklər.
Poroşenko isə şoumen rəqibini uzun müddət oliqarx İqor Kolomoyski ilə sıx münasibətdə ittiham edərək onu “Kolomoyskinin marioneti” adlandırmaqdan çəkinmir. Zelenski ittihamlara belə cavab verir: “Bəzi KİV-lər cənab Kolomoyskidən asılılığımı dilə gətirirlər. Bizi birləşdirən bir dəyər var, o da Kolomoyskinin “1+1” kanalında çalışmağımdır. Kanalda işləməyimi də tam qeyd edə bilmərəm. Çünki “Kvartal- 95” studiyası sadəcə “1+1″ kanalına hazır məhsul satır. Mənim Kolomoyski adlı sahibim yoxdur”.
Haşiyədən çıxsam da xatırladım ki, İqor Kolomoyski Ukraynanın ən varlı 6-cı şəxsidir. Həmçinin ölkənin Birləşmiş Yəhudilər Şurasının sədridir. Vova özü də yəhudi ailəsində dünyaya göz açıb. Yəhudi həmrəyliyi isə geniş və müqəddəs mövzudur.
Gəlin, bir az da bioqrafiyasından danışaq.
1978-ci ilin 25 yanvar tarixində Unraynanın sənaye şəhəri Krivoy Roqda Vova adlı körpə doğulur. Atası Aleksandr Semyonoviç Zelenski texniki elmlər doktoru, informatika kafedrasının rəhbəri idi. Aleksandr Semyonoviç uzun illərdir ki, elmi və pedoqoji fəaliyyətini davam etdirir. Anası Rima Vladimirovna isə evdar qadındır. Vovanın uşaqlıq illəri nənəsi Olqa Solomonovnanın yanında keçib. Bəli, Zelenski ailəsi milliyətcə yəhudidir. Hətta 73 faiz səs çoxluğu ilə Poroşenkoya qalib gələn Mister Ze haqqında çex mətbuatı “Faşist ukraynalıların yeni yəhudi lideri” adlı məqalə çap edir. Lakin az keçmədən məqalənin adına və məzmununa dəyişiklik olunur.
Vovanın 6 yaşı tamam olanda, atasını Monqolustana ezamiyyətə yollayırlar. Aleksandr Semyonoviç ailəsini də özü ilə birgə Erdenet şəhərinə aparır. Balaca Vladimir ömrünün dörd ilini Monqolustanda keçirib təhsil alır. Bu müddətdə monqol dilinə də yiyələnir. Zelenski ailəsi yenidən Krivoy Roqa geri dönür. Təbii ki, monqolca da unudulur.
Vətənə geri qayıdan Vova Krivoy Roqun ən yaxşı ingilis dili təmayüllü gimnaziyalarının birində təhsil alır. Məktəbin özfəaliyyət dərnəklərinə qoşulur, hətta ansamblın gitaraçısı kimi çıxış edir.
“Ansamblın bütün üzvlərinin uzun, düz saçları vardı. Mənim saçım isə burulurdu. Ona görə konsertlərdən əvvəl saçlarımı sulayırdım, həmişə də yaş saçlarla səhnəyə çıxırdım”.
Vova KVN komandasının da üzvü idi. Həmçinin yeniyetmə ikən ağır atletika ilə məşğul olur. İdman sahəsində uğurlarına rəğmən boyunun artmayacağından ehtiyat edib, atletikanın ağır daşını atır. Xatırladım ki, Mister Zenin boyu 166 sm-dir. Amma bu fakt onun dəfələrlə Ukraynanın ən yaraşıqlı kişisi tituluna layiq görülməyinə mane olmayıb. Etiraf edək, tarixdəki dahilərin çoxu bəstəboy olublar.
Vova pianoda ifa edir, bal rəqslərinə gedir, həmçinin Çexovun, Dostoyevskinin əsərləri əsasında səhnələşdirilən tamaşalarda rol alırdı. Al Paçino, Robert De Niro, Leonardo Di Kaprio, Entoni Hopkins kimi aktyorlara pərəstiş edirdi. İncəsənət ehtirasına baxmayaraq, rəsmi peşə arzusunda idi. Öncə sərhədçi olmaq istəyir, sonra isə diplomat və tərcüməçi peşələri arasında dilemmada qalır. Rusiyanın ən nüfuzlu universiteti MQİMO-ya daxil olmaq istəsə də Kiyev Milli İqtisadiyyat Universitetinin hüquq fakültəsini bitirir.
Vovanın yaradıcı istedadı universitetdə təhsil aldığı dövrdə də itib-batmır. KVN komandasının rəqs səhnələrinə dəvət olunur. Ardınca səhnəciklərdə xırda rol alır. 1997-ci ildə komandanın bir neçə üzvü ilə birgə öz “95-ci Kvartal” kollektivini yaradır. Komandası üçün bir-birindən rəngli ssenarilər yazmağa başlayır. Mister Zenin komandası tezliklə münsiflər heyəti və tamaşaçıların rəğbətini qazanır. Bütün MDB-ni gəzib konsert proqramları ilə çıxış edirlər. 2003-ci ildə şirkətlə münaqişə yaranır, Zelenski və komandası iştirakını dayandırır.
Zənnimcə, Vovoçkanın ilk lider toxumu da həmin hadisədə cücərir. Belə ki, özünün KVN-də qalıb ssenari müəllifi və redaktor kimi fəaliyyət göstərməyi təklif olunur. Amma komandasının maraqlarını öz karyerasından üstün tutur. KVN-nin qapısı bağlansa da Ukraynanın ən reytinqli kanalları gənc və istedadlı komandanın üzünə taybatay açılır. Məşhur “95-ci kvartal” studiyaya çevrilir. “1+1”kanalı ilə əməkdaşlığın özəyi də həmin dövrdə cücərir. Zelenski bu günə qədər bir sıra möhtəşəm şou layihələrində yer alıb. Hətta “Komiki güldür” verilişində də çıxış edir. Bir müddət Filip Kirkorovla da əməkdaşlıq edib.
Mənsə Vladimir Zelenskini aktyor kimi çox sevirəm. Yəni prezidenti aktyor, siyasəti şou xoşlayanlardan deyiləm. Odri Hepbörnün dediyi kimi: “Xəyal etməyi bacarmayan realist ola bilməz”. Nəisə əminəm ki, Vovanın ən azı “Böyük şəhərdə məhəbbət”, “8 yeni görüş”, “Üç muşketyor” filmlərini izləmisiniz. Yox? Mütləq baxın…
Son günlər yerli mediada tanınmış şoumenin Bakı və Qəbələyə səfərləri ilə bağlı da fotoşəkillər yayılıb. Məlumat üçün bildirim ki, o, 2017-ci ildə Bakıya, 2018-ci ildə isə komandası ilə birgə Qəbələyə səfər edib. Vəndam, lülə, Əliağa Vahid, Qobustan qaya daşları və digər tarixi dəyərlərimizlə olan fotoları da həmin səfərlərdəndir.
Vova haqda maraqlı bir məlumat bölüşüm. Sən demə, Ukraynanın yaraşıqlı prezidentinin uşaqlıqdan səs tonu çox zəif olub. O isə siyasət işlədərək bu qüsurunu faydasına çevirməyi bacarır. Anlayır ki, səs tembri səhnədə onu digərlərindən fərqləndirəcək.
İndi yəqin düşünürsünüz, qalmaqallı şoumen prezidentin xanımı kimdir? Bilənlər bilir ki, Vovanın həyat yoldaşı Yelena Kiyaşko Zelenskayadır. Təsəvvür edin, paralel siniflərdə oxuyub bir-birinin fərqinə varmayıblar. Tələbə vaxtı təsadüfən tanış olurlar, uzun müddət birgəlikdən sonra münasibətlərini rəsmiləşdirməyə qərar verirlər. Vova deyir, Lenaya qədər qızlarla heç vaxt problemi olmayıb.
“Çox sərt xarakteri var. Onun diqqətini çəkmək üçün dəridən-qabıqdan çıxdım. Bir də gördük bir-birimizi dəli kimi sevirik. “
Lena isə deyir ki, sevgili olduqları müddətdə Vova o qədər məşğul olurdu ki, dəfələrlə ayrılığın astanasından qayıdıblar.
“8 il boyunca mənə evlilik təklif etməyə cəsarət tapmadı. Əmin idi ki, evlənən kimi uşaq planlaşdıracağıq”.
Hər ikisi komediya sahəsində olan cütlük 2003-cü ildə rəsmi nikah kəsdirir və proqnozlar gerçəkləşir. 1 il sonra ilk övladları Aleksandra doğulur. 2014-cü ildə Saşa “8 yeni görüş” filmində baş qəhrəmanın qızı roluna çəkilir. Aleksandra bu gün də atasının maraqlı layihələrində çıxış edir.
2013-cü ildə ailənin hələ ki, sonbeşiyi Kiril doğulur.
Vova olduqca qısqancdır. Yemək üçün də ürəyi gedir. Hər iki vərdişindən özünü zorla saxlayır.
“Lenanı çox qısqanıram, amma bunun üçün mənə ciddi əsas vermir. Bəzən birgə oturub mənim çəkildiyim filmlərə baxırıq. Öpüşmə səhnələrim olanda, özümü çox narahat hiss edirəm. Bilirəm ki, Lena üçün də xoş durum deyil”.
Əslində isə şirin-şəkər Vovanın həyatında gizli eşq macəraları haqda müxtəlif mənbələr xəbər gətirir. Lena vəfakeş, cəfakeş qadın kimi ərinin zəif nöqtələrini görməzdən gəlir.
Xarizmatik prezident uşaqları çox sevir.
“Onlar çox safdırlar, bəzən hadisələrə o qədər məsum reaksiya verirlər ki, düşünürsən, axı biz böyüklər niyə belə kirliyik. Onlar azadlığı sevirlər. Məsələn, Saşa fortepianoda ifa edir. Mən ona deyirəm ki, notları bilmədən, mənimsəmədən ifa etmək mümkün deyil. O isə istədiyi melodiyanı zümzümə edir. Belə çıxır ki, mən onu illər böyü xarakterimə hopdurduğum qəddar doqmalarım, axmaq tələblərimlə yükləyirəm. Düşünürəm ki, artıq xarakter süngərimizi möhkəm sıxıb daha gözəl yaşamağı uşaqlardan öyrənməyin zamanıdır. //Publika.az
Son şərhlər