İki yumruqla xalasının ərinin ölümünə səbəb olan şəxs hakim qarşısına çıxarılıb. Hadisənin baş verməsinə ilkin səbəb isə mərhumun yas mərasimində iştirak etməməsi olub.
Musavat.com xəbər verir ki, Bakı Ağır Cinayətlər Məhkəməsində Vüqar Hüseynovun cinayət işi üzrə məhkəmə prosesi davam etdirilib. Hakim Şəkər Məmmədovanın sədrliyi ilə keçirilən prosesdə dövlət ittihamçısı ittiham aktını elan edib.
İttihama görə, hadisə bu il Abşeron rayonunun Saray qəsəbəsində baş verib. Vüqar Hüseynovun qızı və nəvəsi dünyasını dəyişib. Mərhumların yas mərasimi başa çatandan sonra Vüqar Hüseynov xalasının əri Muğam Şanikovdan yasa niyə gəlmədiyini soruşub. İttihama görə, bu zaman Muğam Şanikov Vüqar Hüseynovun rəhmətə gedən qızı və nəvəsini təhqir edib. Bundan qəzəblənən Vüqar Hüseynov xalasının ərinin baş nahiyyəsinə iki yumruq zərbəsi vurub. Muğam Şakirov aldığı zərbə nəticəsində özündən gedib. Xəstəxanaya çatdırılsa da onu həyatını xilas etmək mümkün olmayıb.
Elan olunan ittihamla Vüqar Hüseynov özünü təqsirli bilmədiyini deyib.
Məhkəmədə mərhumun hüquqi varisi Zaur Şanikov ifadə verib. Zaur Şakirov mərhumun oğludur. O, Vüqar Hüseynovla qohum olduğunu deyib: “Xalamın oğludur. Vüqarın qızı və nəvəsi rəhmətə gedəndə biz birinci gün yasa gedə bilmədik. Anam əməliyyat olunmuşdu. Amma atam həmin gün yasa getdi. Səhər də biz getdik. Atam yasa gedəndə orda olan qadınlar yüksək səslə ağlayıb. Atam da gedib onlara deyib ki, hadisədir, baş verib, hamının yası olur. Bunu deyəndə atamı ordan qovublar. Sonra Vüqar deyib ki, Şakiri öldürəcəm. Atam da pis oldu ki, axı nə deyib? Xalam da mənə dedi ki, Vüqar deyir ki, Şakiri vurub öıdürəcək”.
Şakirov deyib ki, 2 gün sonra Vüqar atasını görüşə çağırıb: “Atam mənə dedi ki, Vüqar ona zəng edib. Atam 3 mərasiminə gedib. Sonrakı yasa getmədi. Atama deyib ki, sən yasa niyə gəlməmisən? Atam da deyib işim var. Atam dedi ki, Vüqar onu görüşə çağırıb. Həmin gün dayım zəng elədi ki, atamı maşın vurub. Mən də dedim ki, atamı Vüqar vurub. Çünki ondan şünhələnirdim. İlk ağlıma o gəldi. Biz xəstəxanaya getdik. Həkimlər dedi ki, artıq beyninin bir hissəsi işləmir. Hazırlıq görməyimi istədilər. 2 gün sonra atam öldü. Mən morqa getdim. Atamın beyin sümüyü içəri batmışdı. O yumruq zərbəsi ilə dəymiş xəsarət deyildi. Beşbarmaqla vurula bilər. Mən bunu ehtimalla deyirəm”.
Vüqar Hüseynov isə Zaurun yalan danışdığını söyləyib. İfadə verən Vüqar Hüseynov qəzada ailəsinin 5 üzvünü itirdiyini deyib: “Qəza baş verən yerə getdim. Gözümün ağı-qarası bir balamı orda maşında, ayaq altında gördüm. Gecə ilə məscidə getdim. Mən elə bir halda idim ki, gözümə heç nə görünmürdü. Onları dəfn elədim. Çöldə ağlayan qadınlara Muğamın nə dediyini bilmirəm. 40-dan sonra mən Muğamla görüşdüm. 4 cümə axşamında Muğam mənim yanımda olub. Mən sadəcə sözgəlişi Muğamdan səbəbi soruşdum ki, nə deyibsən? Amma o mənə elə cavab verdi ki, dilimə gətirə bilmirəm. Prokurorluqda da nə qədər soruşdularsa, demədim. Deməyəcəm də. Amma onu orda necə vurduğumu xatırlamırdım. Mənə kamera görüntülərini göstərəndə bildim”.
V.Hüseynov mərhumla yaxşı münasibətlərinin olduğunu, heç vaxt problem yaşamadıqlarını deyib: “Mən onun dəfn xərclərini də qarşıladım. Həbs edilənə qədər həkim tapdım, müalicəsinə əlimdən gələni etdim. Dayım dedi ki, ailəsi 50 min istəyir. Əvvəlcə şikayətçi deyildilər. Dedilər ki, bilərəkdən baş verən hadisə deyil. Amma sonradan fikirlərini dəyişdilər. Əmimgil dəfələrlə danışığa gedib”.
Qeyd edək ki, Vüqar Hüseynova qarşı Cinayət Məcəlləsinin 126.3-cü (sağlamlığa ağır zərbə vurma, ölümlə nəticələnmə) maddəsi ilə ittiham irəli sürülüb.
Son şərhlər