Əməkdar artist Tünzalə Ağayeva 40 yaşını qeyd edib. Musavat.com xəbər verir ki, sənətçi öz doğum gününü ADDIM Gənclər Təşkilatının 3 illik ildönümü ilə birlikdə keçirib. Bu münasibətlə ADDIM-ın üzvləri və pərəstişkarları ilə alış-veriş mərkəzlərinin birində bir araya gələn əməkdar artist canlı konsert proqramı ilə çıxış edib.
Gecədə “Səs Azərbaycan” layihəsinin iştirakçıları Tofiq Hacıyev, Ləman Dadaşova, Ruslan Alışanın ADDIM-ın himni olan “Bizimlə Addımla” mahnısını səsləndirib. Daha sonra səhnəyə çıxan əməkdar artist “Sevdi can səni” mahnısı ilə mini-konserti açıq elan edib və ard-arda sevilən mahnılarını səsləndirib.
Media nümayəndələrinin suallarına cavab verən əməkdar artist təəssüratlarını bölüşüb: “Doğum günümü tamaşaçılarımla keçirmək arzum idi. Demişdim ki, ya onlarla qeyd edəcəyəm, ya da, ümumiyyətlə, doğum günü keçirməyəcəyəm. Çox sevinirəm ki, bu günü gözəl dəyərləndirdim. İlk təbrik qızımdan gəldi, mənə öz sevgisini təqdim etdi. İlk hədiyyəni dostlarımdan aldım. Mən yaş sindromu yaşamıram. 40 yaşım olur, bu önəmli rəqəmdir. 40 yaşdan sonra həyatın ikinci hissəsi başlayır. İnsanların sevgisi mənim üçün böyük hədiyyədir”.
T. Ağayeva şəxsi həyatından da ilk dəfə söhbət açıb: “Hər kəsə şəxsi həyatım maraqlıdır. 16 ildir ki,mənə bu haqda suallar verirlər. Şəxsi həyatımdan danışmağı sevmirəm. Onu deyə bilərəm ki, şəxsi həyatımda da xoşbəxtəm. Qadın kimi xoşbəxtəm. Sevdiyim şəxs mənə sevgisini hədiyyə etdi. Mən mahnılarımı ona həsr edirəm”.
Gecənin sonunda gənclər və media nümayəndələri ilə fotoçəkim baş tutub.
Son şərhlər