“Türkiyədə dünən gecə baş verən hadisələrdə hərbi çevirilişin özündən çox hərbi çevirilişin görüntüsünü yaratmaq məqsədi daha öndə olub. Bu, çevrilişdən daha çox sanki şou idi”.
Tezis.az xəbər verir ki, bu fikirləri Milli Məclisin deputatı, BAXCP sədri Qüdrət Həsənquliyev deyib.
O, bu hadisənin baş verməsində siyasi hakimiyyətin də rolunun olduğunu bildirib: “Əgər doğrudan da ciddi hərbi planı olsaydı, çevirilişçilər tamamilə başqa cür hərəkət eməli idilər. Amma görürük ki, hərbi çevirilişin özündən çox hərbi çevirilişin görüntüsünü yaratmaq məqsədi daha öndə olub. Əlbəttə, bundan sonra həbslər olacaq, demokratik institutların fəaliyyəti bir müddət dayandırılacaq və yaxud məhdudlaşdırılacaq. Ərdoğan çox rahatlıqla özünün prezidentlik institutuna keçid missiyasını başa vuracaq. Kimin qalib gəlməsindən asılı olmayaraq istənilən ölkədə hərbi çevriliş baş verirsə, bu, həmin ölkənin siyasi hakimiyyəti üçün də böyük məğlubiyyətdir, o ölkə üçün isə faciədir. Düşünürəm ki, bu da böyük faciə idi. Çox təəssüf ki, çoxlu sayda insan ölüb, çoxlu sayda yaralılar var. Bundan sonra çoxlu sayda insanın həyatı sınacaq, həbsxanalardan keçəcək. Bu hadisə qardaş Türkiyədə yaşanmamalı idi. Arzu edək ki, bundan sonra Türkiyə doğrudan da demokratik inkişaf yoluna keçəcək”.
Deputatın fikrincə, Türkiyədə baş verənlər göstərdi ki, ölkə İslam dövləti modelinə keçid istiqamətində addımlar atır: “Bu da dünyəvi dövlət tərəfdarlarını ciddi narahat edir. Mustafa Kamal Atatürkün əlində kifayət qədər səlahiyyətlər olsa da, ölkəni parlamentli respublika modelində məhz orduya təhvil vermişdi. Ordunu dövlətin, qanunçuluğun, demokratiyanın, dünyəvi dövlətçiliyin təminatçısı kimi qoyub getmişdi. Orduda Mustafa Kamalın vəsiyyətlərini əlində tutan insanların duyğularından kimlərsə siyasi məqsədlər üçün istifadə elədi və ölkəni belə faciənin içərisinə soxdu. Əsgərlərə olan münasibət, polisin dindarlardan ibarət formalaşması ona gətirib çıxardı ki, polislər dini meylli olduqlarına görə ölümdən qorxmayaraq özlərindən daha yaxşı silahlanmış əsgərlərin üzərinə getdi. Mənimlə vaxtilə NATO Parlament Assambleyasında şərab içən insanlar sonradan saqqal saxladı, konyuktura naminə şərab içməkdən imtina elədi. Ölkədə maarifçiliyin Qərb standartlarına cavab verməməsi, regionlarda dinin güclü olmasından siyasi məqsədlər üçün istifadə olunur. Polis artıq kifayət qədər dindarlaşdırılıb. Hər halda bu, Türkiyə dövlətini xeyrinə olan məsələ deyil”.
Q.Həsənquliyev hesab edir ki, xalqın əli hər şeydən soyuyub, çəkilib kənarda durub: “Hökuməti müdafiə edənlər daha çox fanatik dindarlar idi. Ona görə də din dövlət və siyasətdən aralı tutulmalıdır. Bu insanlar fanatik olduğuna görə əlinə keçəni buraxmayacaqlar və təəssüf ki, Allah adını çəkib qəddar işlər görürlər, repressiyalar yol açırlar. Düşünürəm ki, Ərdoğan bundan nəticə çıxarmalıdır. Türkiyə dünyəvilik itiqamətində addımlar atmalıdır. Baxın Türkiyə rəsmilərindən çox az adam olar ki, onun xanımı başını bağlamasın. Bu, artıq inamdan irəli gələn bir şey olmadığına görə daha qorxulu bir şeydir. İnsan yalandan bunu edirsə, cəmiyyət və dövlət üçün daha təhlükəlidir. Demokratik institutlar gücləndirilməlidir. Türkiyə parlamentli respublika modelindən uzaqlaşmamalıdır. Əks təqdirsə Türkiyə ən yaxşı halda Misir olacaq”.
Son şərhlər