Dünən Azərbaycan Prezidenti yanında Əfv Məsələləri Komissiyasının yekun iclası keçirilib. Ümumilikdə 400-dən artıq müraciətə baxılıb, onların 1/3 hissəsindən çoxuna müsbət qərar verildiyi açıqlanıb.
Siyahıda tanınmış şəxslərin adlarının olub-olmamasına gəlincə, Komissiyanın üzvü, millət vəkili Məlahət İbrahimqızı “Qafqazinfo”ya açıqlamasında bildirib ki, əfv siyahısına düşənlər cəzasının çox hisssini çəkmiş, ölkə prezidentinə əfv üçün müraciət edən şəxslərdir.
Eyni zamanda, törətdiyi cinayətlə bağlı qarşı tərəf şikayətçi deyilsə, yaxud zərər ödənilibsə və cəmiyyət üçün heç bir təhlükəsi yoxdursa, o şəxslər əfv olunmaları üçün prezidentə təqdim edilir: “Yüzlərlə insan əfv üçün müraciət edir. Təəssüf ki, mətbuat konkret müəyyən şəxslərin adını çəkir. Orada heç kimin ad, soyadına baxılmır. Biz hər kəsə məhbus kimi baxırıq. Əsasnaməyə baxılır, əgər uyğunsa həmin şəxsin adı siyahıya salınır. Lakin bu o demək deyil ki, müraciət edən hər kəs əfv edilə bilər. Əgər biri mənim evimə oğurluğa gəlibsə və mənə vurduğu maddi ziyan ödənilməyibsə, o şəxs əfv edilə bilməz”.
İnsan hüquqları üzrə Birgə Qrupun üzvü, hüquq müdafiəçisi Novella Cəfəroğlu isə sayta bildirib ki, komissiyaya əvvəlki siyahı ilə müraciət ediblər və prezidentə təqdim edilən siyahıda həmin şəxslərin adlarının olacağına, hamısının əfv olunacağına ümid edirlər.
Qeyd edək ki, əfv sərəncamının Novruz Bayramına qədər veriləcəyi gözlənilir.
Son şərhlər