Hollivud ulduzu, aktyor Eşton Katçer rəsmi `Facebook` səhifəsində Gürcüstanın Batumi şəhərində yerləşən Əli və Nino heykəli haqqında link paylaşıb.

`aplus.com`dan paylaşılan linkə məşhur aktyor `Bu həqiqətən də hərəkət edir` (This truly is moving) şərhi yazıb.

Qeyd edək ki, `aplus.com` saytı Əli və Nino heykəli və romanı haqqında geniş yazı dərc edib.

Əli və Nino — ilk dəfə 1937-ci ildə Vyanada alman dilində E.P.Tal Verlaq tərəfindən nəşr edilən və indiyədək dünyanın 33 dilinə tərcümə edilən məhəbbət romanıdır

Əsərin ilk nəşrində müəllif kimi Qurban Səid göstərilmişdir. Rəsmi sənədlərə əsasən Qurban Səid avstriyalı baronessa Elfrida fon Ehrenfelsin təxəllüsüdür. Buna görə də uzun illər əsərin həqiqi müəllifi Elfrida fon Ehrenfels hesab olunurdu. Lakin, amerikalı şərqşünas Tom Rayz əsərin əslən Azərbaycandan olan yəhudi mənşəli yazıçı Lev Nissembauma məxsus olduğunu, baronessa Elfrida fon Ehrenfelsin isə yalnız onun məşuqəsi olmasını sübut edə bilmişdi. Azərbaycan Yazıçılar Birliyi isə 1993-cü ildə qəbul etdiyi qərarda əsərin müəllifinin Y.V.Çəmənzəminli olduğunu təsdiq etdi.