Sumqayıtda 13-cü mikrorayonda yaşayan 45 yaşlı Mehriban Səmədova “Təmiz dünya” İctimai Birliyinə ailəsinin təhdid edilməsi ilə bağlı müraciət edib. Mərkəzdən Cebhe.info-ya verilən məlumata görə, bir oğlu və bir qızı ilə atasının onlara bağışladığı evdə yaşayan Mehriban Səmədova bir neçə il əvvəl həyat yoldaşından rəsmən ayrılıb. Ancaq boşanma rəsmiləşdirilsə də, keçmiş ər qayınatanın bağışladığı mənzili tərk etmir.
“Evdən çıxmaması bir tərəfə, mütəmadi olaraq keçmiş xanımını və övladlarını təhdid edir. Qadını təhdid edir ki, ona pul ödəsin. Zorakılıq o həddə çatıb ki, qadın stress və qorxudan onkoloji xəstəliyə tutulub. Qızıllarını əməliyyat olunmaq üçün satıb, ancaq keçmiş ər bu pulu da onun əlindən alıb. Kişi israrla polisdə adamlarının olduğunu bildirir, qadın dəfələrlə müraciət etsə də konkret heç bir addım atlmır. Qadının həyatına ciddi təhlükə var. Hər gün qadın ölümü ilə bağlı məlumatlar yayılır, belə hadisələrin təkralanma ehtimal çox yüksəkdir. Kişinin öz evi olduğu halda rəsmi boşanmadan əvvəl həmin evi qardaşı oğluna bağışlayıb. İş hətta o yerə çatıb ki, ata təkcə keçmiş həyat yoldaşını yox, övladlarını da ölümlə təhdid edir. Qadına onu öldürəcəyini, qızını doğrayacağını, oğlunun isə cibinə narkotik maddə qoyaraq həbs etdirəcəyini bildirib. Dediyinə görə, ailəni elə vəziyyətə salacaq ki, özləri evi ona təhvil verəcəklər”,- deyə mərkəzdən bildirilib.
Mərkəzin məlumatına görə, bu təhdidlər övladlara da ciddi təsir edir: “Hətta oğul hərdən ataya qarşı hansısa hərəkətlər etmək dərəcəsinə qədər gəlir. Yəni bir ailə faciəsinin astanasındayıq, əgər qarşısı alınmazsa, çox dəhşətli hadisələr baş verə bilər. Birlik məhkəməyə müraciət edib təhlükəsizlik orderinin təbtbiqinə çalışacaq, ancaq onun icrası mümkünsüz olacaq. Buna görə də hüquq-mühafizə orqanları dərhal hadisəyə reaksiya verməldir”.
Son şərhlər